Husi loron 22 to’o 26 fulan jullu, Provedoria Direitus Umanus no Justisa (PDHJ), ho kolaborasaun ho Unidade Asesoria Direitus Umanus ONU nian (UADU) no Sentru Formasaun Polísia (CFP), hala’o sesaun treinamentu ho objetivu atu hasa’e komprensaun membru Polísia Nasionál Timor-Leste (PNTL) kona-ba direitus umanus iha Rejiaun Administrativa Espesiál Oé-Cusse Ambeno (RAEOA). Treinamentu ne’e hetan partisipasaun husi ofisiál PNTL na’in 26, mane na’in 20 no feto na’in 6 no foka liu ba koñesimentu sira ne’ebé nesesáriu hodi prevene violasaun direitus umanus iha sira nia komunidade nia laran.
Iha intervensaun makloke, Provedóra-Adjunta ba Direitus Umanus Maria Marilia da Costa subliña formasaun nia objetivu atu familiariza ajente polísia sira kona-ba enkuadramentu legál sira nasionál ka internásionál liga ho direitus umanus. Koñesimentu ida-ne’e, nia nota, importante tebes ba Ofisiál sira tantu iha rai-laran no durante sira nia envolvimentu iha misaun manutensaun dame internasionál sira iha Nasoins Unidas.
“Nu’udar instituisaun independente ne’ebé hetan mandatu atu promove no proteje direitus umanus no tane aas governasaun di’ak, PDHJ habelar nia atividade hodi abranje entidade públika hotu-hotu, inklui Polísia Nasionál Timor-Leste,” afirma Provedora-Adjunta.
Énfaze Timor-Leste nia kompromisu ba prinsípiu demokrátiku no estadu direitu, Adjunta subliña PNTL nia kna’ar nu’udar ajente estadu atu salvaguarda no tane aas direitu fundamentál sira. Responsabilidade ne’e konsagra iha Artigu 147(2) Konstituisaun RDTL, ne’ebé fó mandatu katak PNTL ténke tane aas direitus umanus iha prevensaun ba atividade kriminál sira.
Provedóra-Adjunta subliña esforsu kolaborativu entre PDHJ ho PNTL, ne’ebé hahú iha tinan 2015 no reafirma iha tinan 2019, konsegue realiza ona sesaun formasaun hamutuk 25 ne’ebé hala’o iha teritóriu Timor-Leste tomak husi tinan 2015 to’o 2023. Sesaun hirak ne’e fó ona benefísiu ba partisipante PNTL hamutuk na’in 708, ne’ebé kompostu husi 549 mane no feto 159.
“Formasaun ne’e subliña ami nia kompromisu atu hasa’e kapasidade membru PNTL sira nian, klarifika sira nia responsabilidade, no reforsa sira nia misaun,” subliña Adjunta.
Atu taka, Provedóra-Adjunta enkoraja formandu sira hotu atu envolve ativamente iha programa formasaun durante loron lima nian, hodi subliña importánsia atu hetan koñesimentu pertinente ne’ebé sei hasa’e sira-nia responsabilidade loroloron nian.
This post is also available in: English