Jenebra, 31 marsu 2026 – Provedór Direitus Umanus no Justisa, Virgílio da Silva Guterres “Lamukan”, organiza Enkontru Tripartida ida iha Jenebra, halibur Nicole Hogg, Sekretária Jerál hosi Asosiasaun Prevensaun no Tortura (APT), Embaixadór António da Conceição husi Misaun Permanente Timor-Leste iha Jenebra, paralelu hosi Enkontru Anuál GANHRI 2026. Diskusaun ne’e foka liu ba esforsu ne’ebé la’o hela hodi halo advokasia ba ratifikasaun Protokolu Fakultativu ba Konvensaun Kontra Tortura (OPCAT).
Durante enkontru, Provedór fornese atualizasaun kona-ba asaun advokasia nasionál balun ne’ebé hala’o tiha ona atu avansa ratifikasaun OPCAT iha Timor-Leste. Ne’e inklui karta rekomendasaun formál ida ne’ebé haruka ba Prezidente Parlamentu Nasionál, enkontru subsekuente ida ho Prezidente Parlamentu Nasionál, no mós workshop no diálogu sira ne’ebé ko-organiza ho APT no AJAR Timor-Leste, ne’ebé hetan partisipasaun ativu hosi parte interesada sira iha governu, parlamentu, no organizasaun sosiedade sivíl sira.
Embaixadór António da Conceição simu ho laran-haksolok inisiativa ne’e no reafirma Timor-Leste nia pozisaun forte kona-ba direitus umanus, hodi nota katak nasaun ne’e nia luta rasik ba independénsia halo imperativu atu kontinua valoriza no luta ba direitus umanus. Nia simu ho laran-haksolok ideia sira ne’ebé hato’o durante enkontru no konfirma katak nia sei komunika ho MNEK, hafoin ne’e sei prepara rezolusaun Konsellu Ministru nian no haruka ba Parlamentu hodi ratifika. Embaixadór mós rekoñese serbisu valiozu husi APT, hodi observa katak esforsu sira hanesan ne’e dala barak fó rezultadu ne’ebé signifikativu.
Nicole Hogg, Sekretária Jerál APT nian, fahe atualizasaun ida kona-ba APT nia serbisu globál atu prevene tortura no destaka ligasaun klean entre APT no OPCAT. Nia esplika katak APT nia fundadór fiar iha nesesidade atu vizita fatin sira ne’ebé maka ema sira hetan privasaun hosi sira nia direitu sira iha públiku nia oin, tanba vizita sira hanesan ne’e bele prevene tortura, fó sai abuzu sira, no lori mudansa pozitivu ba sira ne’ebé hela iha prizaun ka fatin detensaun ruma. Nia hatete liután katak APT kontinua serbisu atu asegura ratifikasaun barak liután ba OPCAT. Karik Timor-Leste ratifika, nia hatutan, nasaun ne’e sei sai líder rejionál kona-ba prevensaun tortura.
Provedór reafirma katak PDHJ sei kontinua nia advokasia ba ratifikasaun OPCAT no afirma katak iha tempu badak nia sei komunika ho MNEK atu ko’alia kona-ba pasu konkretu sira no dalan ba oin ba ratifikasaun.
This post is also available in: English