Dili : Ekipa Kuatrulaterál ne’ebé kompostu husi Provedoria Direitus Humanus no Justisa (PDHJ), Komisaun Anti Korrupsaun (KAK), Komisaun Funsaun Públika (KFP) no Inspektor Jerál du Estadu (IJE), Kinta-feira, 19/09/2019, halo klehat (inspesaun) surpreza ba Portu Dili, hodi identifika indisius no alerta ba senior hirarkia estrutura atu foti medidas nesesariu hodi solusiona.
Klehat surpreza ne’e realiza bazeia ba akordu ne’ebé estabelese entre instituisaun haat ne’e iha tinan 2015, hodi regula vontade kbiit servisu nian relasiona ho problema no ameasa sira ne’ebé mosu, provinente husi krime pratikadu iha funsaun públika nia ezersisiu no mal-administrasaun.
Tanba ne’e, ekipa kuatrulaterál kontinua halo ejersisiu hodi klehat alvu husi vizita surpreza ne’e mak hanesan Funsionáriu Públikus no Ajente Administrasaun Públika sira no Dirijente kargu Diresaun Xefia.
Tuir relatóriu ekipa kuatrulaterál nian, ne’ebé defini konaba objetivu husi klehat surpreza ne’e katak, atu hakbesik an liutan ba funsionamentu administrasaun iha baze nomos atu halo monitorizasaun iha terrenu, hodi haree saida maka funsionariu sira hasoru, nomos atu prevene hahalok sira ne’ebé iha indikasaun viola regra sira iha Administrasaun Públika, hodi nune’e bele hadia no asegura di’ak liutan Boa Governasaun, haktuir ba mandatu VIII Governu Konstitusionál ne’ebé hatur nu’udar prinsipiu fundamentál dezenvolve Administrasaun Públika ho efisiénsia, efikásia no responsabilidade, ho medida prevensaun no kombate hahalok sira ne’ebé kontra Regra no Prosedimentu Legál sira iha Administrasaun Públika.
Nune’e, iha klehat surpreza ba Portu Dili, ekipa kuatrulaterál hasoru malu ho Xefe Operasionál no Diretor Portu Dili, inkluindu komversa direta ho funsionariu sira, no halo klehat ba fatin sira iha área Portu nian, ne’ebé presizamente tenke hadi’ak ninia sistema jestaun, hodi fó ambiente servisu ne’ebé dignu ba funsionariu sira.
Depois de halo klehat surpreza iha Portu Dili, ekipa hakat kedas ba hasoru Diretor Jerál iha eis edifisiu Ministériu Finansas, Palacio do Governo, hodi halo justifikasaun ba informasaun hirak ne’ebé ekipa koilleta iha klehat surpreza ne’e. Hafoin kuaze oras rua nia laran halo diskusaun, ekipa ne’e promete sei kontinua ninia klehat surpreza ba fatin refere, nomos fatin sira seluk tuir planu ne’ebé definidu.