Dili : Loron, 8 Fevereiru 2024, Sr. Gerard ho nia ekipa husi Washington DC no reprezentante USAID Timor-Leste halo vizita kortezia mai instituisaun Provedoria dos Direitos Humanos e Justiça (PDHJ), inklui halo konsultasaun ho Provedor de Direitos Humanos e Justiça, Sr. Virgílio da Silva Guterres “Lamukan” ho nia Provedor Adjunto Boa Governação, Sr. Rigoberto Monteiro ho nia tekniku sira kona ba ideias inisiu Accountability and Integrity Mechanism (AIM) USAID/Timor-Leste.
Entretantu enkontru ne’e rasik koalia liu kona ba programa AIM ne’ebé maka dezenha atu fortalese ekosistema akuntabilidade Timor-Leste no promove reformas anti-korupsaun Governu Timor-Leste, no hanesan metas ba governasaun di’ak ne’ebé estabelese tiha ona iha Planu Estratejiku Dezenvolvimentu Nasional Timor-Leste (2011-2030). Programa ne’e faz parte husi jerasaun foun hodi apoiu demokrasia husi USAID iha Timor-Leste ho objetivu, atu haforsa instituisaun xave, inklui autores governamentais, parlamentares, sosiedade sivil, atu haforsa kapasidade sistema demokrátiku Timor-Leste hodi atinji “ambiente ida inkluzivu, prosperu, no saudavel” ba populasaun jerasaun foun ne’ebé sei kontinua aumenta.
Tamba ne’e, sira nia parte sei servisu hamutuk ho sosiedade sivil, guvernu no parlamentu Timor-Leste atu haforsa kapasidade estratejia, institusional, komunikasaun no koordenasaun kapasidade husi instituisaun xave akuntabilidade sira espesialmente Provedoria dos Direitos Humanos e Justiça inklui orgaun relevante sira seluk. Independensia instituisaun ne’ebé forte husi autoridade fiskalizador sira aumenta tan ho dezenvolvimentu politikas lejislativa no governamentais ne’ebé solidu, garantia katak, sidadaun kapasitadu bele halo governu akuntabilidade, tamba ne’e sei lori dezenvolvimentu ekonomiku inkluzivu liu tan no sustentavel.
Enkontru ne’e rasik realiza iha sala Biblioteca PDHJ Caicoli, no marka mós prejensa husi Sr. Secretario Executivo, Sr. Ambrosio Grasiano Soares, Chefe Unidade Asistensia Juridika, Administrativa e Pesquisa, Sra. Filomena Dias ho Asesor Legal, Sr. José Antonio, Pontu Fokal Relasaun Publika e Kordenasaun Institusional, Sra. Olga Vila Nova Sequeira.
