Dili– Provedoria dos Direitus Humanus e Justiça (PDHJ) hanesan instituisaun independente ne’ebe iha kna’ar importante atu promove no proteje direitus humanus e promove boa governasaun. Nune’e mak PDHJ liu husi Diresaun Boa Governasaun, Departamentu Promosaun no Edukasun, iha loron 11 Marsu 2015, halao atividade diseminasaun kna’ar PDHJ ba Funsionarius públiku Secretariu Estadu Joventude no Desportu (SEJD) iha edifisiu SEJD Lecidera-Dili.
Objetivu husi atividade ne’e atu habelar informasaun kona-ba Papel PDHJ, Prinsipiu Baziku, Kategoria Violasaun Governasaun Di’ak, Direitus Humanus no Oinsa Prosesu atu Hato’o Kesar ba PDHJ.
Provedora Interina atual Provedora Adjunta ba área Governasaun Di’ak, Dra. Jesuina Maria Ferreira Gomes hateten ba partisipantes sira katak PDHJ nia kna’ar atu hare’e no buka hatán sidadaun sira nia keixa hasoru poderes públiku. Kompetensia PDHJ nian mak atu halo investigasaun, edukasaun no promosaun, monitorizasaun no advokasia. PDHJ sei avalia kesar sira, hala’o investigasaun no hato’o rekomendasaun ba órgaun kompetente, tuir lei PDHJ la hola desizaun.
Iha fatin hanesan, Director Governasaun Di’ak, Sr. José Manuel Fereira esplika ba partisipantes sira katak, atividade ida ne’e planeadu tiha ona husi Diresaun Boa Governasun atu fahe informasaun ba Ministerio hotu-hotu inklui mos autoridades Komunitaria sira Dili, atu nune’e sira (Autoridade Komunitaria Red) mos iha koñesimentu kona-ba Prinsipiu Governasaun Di’ak no Kategoria Violasaun Governasaun Di’ak.
Iha oportunidade ne’e mos, Ofisial Simu Kesar, Francelina Tilman esplika konaba oinsa dalan atu hato’o kesar ba PDHJ no mos Oficial Promosaun no Edusaun iha Dirasaun Direitus Humanus, Moizes Nazario Pereira mos esplika materia direitus humanus basiku ba partisipantes sira, atu nune’e sira mos iha koñesimentu.