RAEOA, 10 juñu 2025 — Provedoria Direitus Umanus no Justisa (PDHJ) Delegasaun Territoriál RAEOA, ne’ebé lidera husi Diretóra Domingas da Paixão Kefi no akompaña husi Ofisiál Promosaun, Ofisiál Simu Keixa, no Investigadór, hala’o sesaun divulgasaun informasaun ba komunidade no autoridade lokal sira iha bairu Bitila no Naktuka, suku Bene-Ufe, Postu Administrativu Nitibe.
Sesaun ne’e ho objetivu atu hasa’e koñesimentu kona-ba knaar PDHJ nian, prinsípiu xave direitus umanus, padraun governasaun di’ak, no prosesu keixa.
Iha abertura sesaun ne’e, Xefe Aldeia Marcos Meni hato’o boas vindas ba ekipa PDHJ no hato’o apresiasaun tanba bele lori inisiativa ida ne’e ba komunidade. Nia enkoraja partisipante sira atu aproveita didi’ak diskusaun hodi hametin sira-nia komprensaun kona-ba sira-nia direitu no responsabilidade no aplika iha moris loroloron.
Durante diskusaun, membru komunidade sira fahe sira-nia preokupasaun no husu ba PDHJ atu rekomenda ba governu, liuhosi ministériu relevante sira, hadi’a monitorizasaun no responsabilizasaun ba programa sira ne’ebé implementa iha suku, partikularmente iha area saúde, edukasaun, no agrikultura.
Sesaun ne’e hala’o iha Sede Aldeia Manan iha Tersa-feira, 10 juñu 2025. Hanesan parte ida husi PDHJ ninia misaun hodi kontinua esforsu sira hodi hasa’e konxiénsia komunidade no autoridade lokál sira, ho objetivu atu ema barak liután komprende PDHJ nia papél, direitus umanus, no prinsípiu sira kona-ba governasaun di’ak, sei ajuda prevensaun ba violasaun sira. Nune’e mós bainhira sira direitu violadu, sira sei la nonok maibe sei hato’o keixa no buka justisa.
This post is also available in: English