Dili, 30 janeiru 2026 – Provedoria Direitus Umanus no Justisa konklui ona indusaun no kapasitasaun durante semana rua ba Ajente Administrasaun Públika (AAP) na’in 13, ne’ebé hala’o iha loron 12 to’o 30 janeiru 2026. Formasaun ne’e ho objetivu atu prepara partisipante sira atu sai hanesan pontu fokál PDHJ iha munisípiu sira Lautem, Viqueque, Baucau, Aileu, Ainaro, Ermera, Covalima, Maliana no Oé-Cusse.
Provedór Virgílio da Silva Guterres “Lamukan” hato’o nia esperansa katak formasaun ne’ebé ekipa PDHJ hala’o sei sai hanesan matadalan prátika ba pontu fokál sira hodi hala’o kna’ar ho profisionál no tuir mandatu instituisaun nian. “Ha’u hein katak formasaun ne’ebé ita-boot sira hetan durante semana rua ne’e bele sai hanesan referénsia ida ba ita-boot sira-nia servisu iha munisípiu sira, nune’e ita-boot sira bele hala’o ita-boot sira-nia funsaun ho profisionál no responsabilidade,” nia dehan.
Diskursu iha Biblioteka PDHJ iha Caicoli Sesta (30/1), Provedor subliña katak lisaun ne’ebé hetan durante formasaun tenke haree hanesan fundasaun inisiál, la’ós pontu finál.
“Ha’u hein katak buat ne’ebé ita-boot sira aprende ona durante loron hirak ne’e sei natoon atu sustenta ita-boot sira ba tempu balun, hanesan provizaun inisiál ida. Maibé importante atu ita-boot sira tenke aprende nafatin, dezenvolve imi-nia an no hametin imi-nia kapasidade ho independente,” nia hateten.
Provedór apela liután ba pontu fokál sira atu estabelese komunikasaun di’ak no profisionál ho autoridade lokál sira, partikularmente Prezidente Autoridade Munisipál, Polísia Nasionál Timor-Leste (PNTL) no FALINTIL–Forsa Defeza Timor-Leste (F-FDTL). “Ita tenke mantein komunikasaun ne’ebé di’ak ho autoridade sira, kuandu buat ruma la loos ita tenke dehan la loos, maibé tenke hato’o ho maneira ne’ebé profisionál, la’ós tanba emosaun ka hirus pesoál,” nia salienta.
Aleinde ne’e, nia fó hanoin ba funsionáriu foun sira atu tane aas integridade, responsabilidade, no lealdade no evita konflitu interese. “Dalaruma ema mai hato’o keixa kona-ba ita-nia parente rasik ka ema ne’ebé besik ita, iha situasaun sira hanesan ne’e, ita tenke mantein neutru no tau interese públiku aas liu relasaun pesoál,” Provedór hateten.
Antes ne’e, iha loron 16 janeiru 2026, Provedór Direitus Umanus no Justisa, hamutuk ho Komisaun Funsaun Públika, halo ona serimónia tomada de posse ba Ajente Administrasaun Públika na’in 13. Pontu fokál sira sei atribui hanesan tuirmai: Marçal Mariz da Cruz no Lino Soares (Ainaro); Marta Clementina Ambo de Carvalho no José Marçal de Sousa Amaral (Lautem); Norberto Amaral Ribeiro no Abílio Tilman (Covalima); Juvência Irene da Costa (Aileu); Agostinho Monteiro (Ermera); Januário Soares Piedade Pinto (Viqueque); Pascoela Moniz de Jesus (Maliana); no Águeda da Costa Xavier nu’udar pesoál Administrasaun no Finansas iha PDHJ Delegasaun Territoriál Oe-Cusse.
This post is also available in: English