Dili, 3 outubru 2025 – Iha espíritu kolaborasaun, Provedoria Direitus Umanus no Justisa (PDHJ), Komisaun Anti-Korrupsaun (CAC), Inspetór Jerál Estadu (IGE), no Komisaun Funsaun Públika (CFP) hamutuk iha Formasaun ba Formadór sira (ToT) tuir Akordu Kuadrilaterál. Treinamentu ne’e foka liu ba harii koñesimentu no abilidade hodi hametin governasaun di’ak no direitus umanus iha instituisaun públiku Timor-Leste nian.
Treinamentu ne’e fasilita husi konsultór Miguel Carvalho no foka liu ba “Revizaun ba Manuál Boa Governasaun no Direitus Umanus”, ne’ebé foin lalais ne’e atualiza hodi reflete realidade atuál, dezafiu, no ezijénsia ne’ebé Timor-Leste hasoru. Formadór hamutuk na’in 27 hosi instituisaun haat partisipa, hodi prepara sira atu fó koñesimentu ba funsionáriu públiku sira no komunidade sira iha sira nia área serbisu ida-idak.
Iha nia diskursu abertura no enserramentu, Provedór-Adjuntu ba Boa Governasaun, Rigoberto Monteiro, subliña importánsia atu armoniza persesaun no aprosimasaun husi instituisaun haat iha aplikasaun prinsípiu governasaun di’ak. “Formasaun ne’e la’ós de’it atu hametin koñesimentu, maibé mós atu garante koerénsia kona-ba oinsá ita-nia instituisaun sira komprende no aplika prinsípiu governasaun di’ak, bainhira viola prinsípiu ida bele fó konsekuénsia direta ba protesaun direitus umanus.Tanba ne’e, esensiál tebes atu ita komprende didi’ak manuál ne’e, nune’e ita bele hato’o ho efetivu iha ita-nia sesaun formasaun ba públiku no komunidade luan,” nia afirma.
Revizaun ba manuál no implementasaun formasaun ne’e hala’o ho apoiu no kooperasaun husi Programa Nasoins Unidas ba Dezenvolvimentu (PNUD), ne’ebé marka pasu importante ida hodi reforsa knaar husi instituisaun Kuadrilaterál sira iha monitorizasaun, fiskalizasaun, no orientasaun ba entidade públika sira ba governasaun ne’ebé transparente liu, responsabiliza, no bazeia ba direitu.
This post is also available in: English