Dili, 11 jullu 2025 – Provedór Direitus Umanus no Justisa, Virgílio da Silva Guterres “Lamukan”, partisipa iha semináriu ne’ebé organiza iha ámbitu Festivál Kultura Rezisténsia Populár (FKRP) 2025, ne’ebé konta mós ho lansamentu livru komemorativu rua “Meraih Cahaya: Memori Kolektif Timor-Leste Pasca-Konflik” and “Jejak-Jejak Ingatan: Mengenang Masa Lalu, Mencintai Masa Depan”. Eventu ne’e hala’o iha Salaun Konferénsia Centro Nacional Chega! Institutu Públiku (CNC I.P), ne’ebé lokaliza iha fatin istóriku eis Prizaun-Comarca iha Balide.
Semináriu no lansamentu livru ne’e marka aniversáriu ba dala-8 estabelesimentu Centro Nacional Chega! I.P, selebra ho tema “Memória Koletiva: Dalan ba Rekonsiliasaun.”
Iha eventu refere, Provedor simu Sertifikadu Apresiasaun husi CNC I.P. nu’udar rekoñesimentu ba ninia kontribuisaun ba promosaun direitus umanus no justisa. Hafoin ida ne’e halo komentariu kona-ba signifikadu hosi livru rua ne’e, hodi elojia sira nia papél hodi prezerva memória nasionál no reforsa valór sira justisa, lia-loos, no rekonsiliasaun nian.
Eventu ne’e ofisialmente loke husi Vise-Ministru Asuntu Parlamentar, Aderito Hugo da Costa, ne’ebé reprezenta Primeiru-Ministru no Ministru Prezidénsia Konsellu Ministru. Nia destaka signifikadu atu prezerva memória istórika Timor-Leste nian nu’udar komponente esensiál ba rekonsiliasaun no unidade nasionál.
Livru rua ne’ebé lansa iha eventu ne’e aumenta profundidade ba narrativa pós-konflitu Timor-Leste nian:
- “Meraih Cahaya: Memori Kolektif Timor-Leste Pasca-Konflik”- aprezenta kolesaun istória no reflesaun sira ne’ebé kaptura oinsá sosiedade Timorense kontinua envolve ho memória konflitu pasadu nian, dada forsa no identidade hosi esperiénsia istórika sira ne’ebé fahe.
- “Jejak-Jejak Ingatan: Mengenang Masa Lalu, Mencintai Masa Depan” -hanesan antolojia ida ne’ebé reflete kona-ba sofrimentu no rezisténsia pasadu, enkuantu mós subliña importánsia atu hanoin hikas istória hodi harii futuru ida ne’ebé bazeia ba dame, domin, no justisa.
Publikasaun rua ne’e ho objetivu atu prezerva memória nasionál no sai hanesan ferramenta edukasionál sira hodi inspira jerasaun foun sira atu valoriza lia-loos, justisa, no dignidade umana.
Festivál Kultura Rezisténsia Populár kontinua sai hanesan plataforma nasionál hodi reflete kona-ba Timor-Leste nia luta ba independénsia, enkuantu promove konxiénsia sívika, justisa sosiál, no protesaun direitus umanus ba jerasaun sira iha futuru.
This post is also available in: English