Iha loron 10 fulan juñu tinan 2025, Provedór Direitus Umanus no Justisa, Virgílio da Silva Guterres “Lamukan”, partisipa nu’udar membru juri ba Prémiu Jorge Sampaio, ne’ebé hala’o iha Embaixada Portugál iha Timor-Leste. Prémiu prestijiadu ne’e, fó onra ba matebian Prezidente Portugál, selebra tema “Liberdade”, hodi reflete valór sentrál ba direitus umanus no demokrasia. Provedór mós partisipa iha aprezentasaun prémiu sira, hodi destaka PDHJ nia kompromisu ba edukasaun sívika no promosaun direitus umanus.
Eventu ne’e halibur konvidadu nasionál no internasionál sira, inklui reprezentante sira hosi UNDIL, IILP, Sentru Kulturál Jorge Sampaio, no Embaixada Portugál. Manan-na’in sira simu sertifikadu, livru sira, apoiu finanseiru, no na’in tolu maka hili ba Universidade Veraun nian oferese husi Universidade Macau, ne’ebé hetan apoiu hosi MESCC. Inisiativa ida-ne’e reforsa importánsia hosi envolvimentu juventude no troka kulturál hodi harii sosiedade ida ne’ebé bazeia ba liberdade, dignidade, no justisa.
This post is also available in: English