Bangkok, Tailándia, 24-25 2024, Provedór Direitus Umanus no Justisa (PDHJ), ne’ebé reprezenta husi Provedór-Adjuntu Rigoberto Monteiro, foin lalais ne’e destaka kestaun krusiál sira kona-ba igualdade jéneru iha Enkontru Jerál Anuál ba dala 29 husi Fórum Ázia Pasífiku (APF) husi Instituisaun Nasionál sira Direitus Umanus nian iha Bangkok, Tailándia, hodi subliña sira-nia signifikasaun iha kontestu luan liu kona-ba direitus umanus iha Timor-Leste.
Durante sesaun dahuluk, membru ativu sira hili lideransa hosi komisaun APF, ne’ebé inklui reprezentante sira hosi Jordánia, Koreia-Súl, Pakistaun, Filipina, no Indonézia. Komisáriu Direitus Umanus Jordania nian, Zeid Ra’ad Al Hussein eleitu nu’udar Prezidente, enkuantu Atnike Nova Sigiro hosi KOMNASHAM Indonézia nian eleitu nu’udar Vise-Prezidente.
Iha sesaun daruak, membru APF sira aprezenta sira-nia nasaun nia progresu, dezafiu, no obstákulu sira relasiona ho igualdade jéneru, mudansa klimátika, no protesaun ba defensór direitus umanus.
Iha nia aprezentasaun, Provedór-Adjuntu Monteiro foka liu ba igualdade jéneru, diskute kona-ba progresu no dezafiu ne’ebé Timor-Leste hasoru hodi promove asuntu krusiál ida ne’e. Nia destaka mós inisiativa sira PDHJ nian ne’ebé ho objetivu atu hasa’e igualdade jéneru iha rai-laran. PDHJ hato’o apoiu tomak ba KOMNASHAM Indonézia nia kandidatura ba komisaun lideransa APF.
Provedor-Adjuntu Monteiro hato’o agradesimentu ba sekretariadu APF no hato’o parabens ba lideransa foun ne’ebé eleitu ba mandatu tinan rua oin mai.
Enkontru ne’e fó oportunidade ba Konsellu Fórum no membru APF sira atu haree filafali dezempeñu organizasaun nian iha tinan kotuk, hodi aborda kestaun sira hanesan estatutu akreditasaun membru sira-nian, aplikasaun ba membru sira, eleisaun ofisiál sira, no aprovasaun ba konta auditória anuál sira.
Enkontru Jerál Anuál APF nian maka ezijénsia legál ida ba organizasaun no sai hanesan plataforma ida hodi diskute asuntu esensiál sira governasaun nian.
Molok Enkontru Jerál Anuál iha loron 24 fulan-setembru tinan 2024, Provedór-Adjuntu Monteiro partisipa iha enkontru koordenasaun ida ho membru sira rejiaun Sudeste Aziátiku nian hosi SENAF, hodi afirma pozisaun sira partikularmente kona-ba kandidatura sira hosi Filipina, Indonézia, no Malázia ba lideransa APF nian.
Enkontru Jerál Anuál ba dala 29 hetan partisipasaun hosi instituisaun membru 26, inklui PDHJ Timor-Leste, Komisaun Direitus Umanus Independente Afganistaun, Komisaun Direitus Umanus Austrália, no sira seluk hosi rejiaun Ázia Pasífiku tomak.
This post is also available in: English