Díli, 24 Jullu 2024– Virgílio da Silva Guterres ‘Lamukan,’ Provedór Direitus Umanus no Justisa, foin lalais ne’e kontribui ba sesaun formasaun komprensivu ida ba Inspetór Eskola foun sira liga ho asuntu direitus umanus no governasaun di’ak. Sesaun ida ne’e halo parte iha kurríkulu jerál ho objetivu atu hasa’e inspetór sira-nia abilidade iha matéria oioin.
Iha ninia diskursu, Guterres salienta importánsia krítiku hosi direitus umanus no governasaun di’ak, no oinsá prinsípiu sira-ne’e bele integra iha ambiente edukasionál sira. Nia iha esperansa katak ho nia kontribuisaun iha sesaun ne’e bele eleva inspetór sira nia abilidade atu defende no proteje direitus umanus iha eskola sira.
Guterres subliña importánsia hodi kaer metin ba tratadu internasionál sira direitus umanus nian ne’ebé ratifika ona hosi Timor-Leste, ne’ebé krusiál ba salvaguarda direitus umanus no prevene violénsia hasoru labarik sira. Nia enkoraja inspetór sira atu monitoriza ho ativu no rezolve kualkér forma violénsia iha eskola sira no subliña importánsia hosi komunikasaun ne’ebé efetivu entre profesór sira no estudante sira.
Hatutan tan, Provedór enfatiza direitu estudante sira nian ba edukasaun ho kualidade no fornesimentu materiál edukasionál nesesáriu sira hosi profesór sira. Nia fó hanoin ba partisipante sira katak profesór sira ténke mantein prezensa iha klase ne’ebé konsistente atu asegura katak estudante sira-nia direitu ba edukasaun respeitadu.
Treinamentu ne’e hala’o iha Salaun INFORDEPE Balide, Dili, no hetan partisipasaun husi Inspetór eskola husi munisípiu 13, ho totál inspetór foun hamutuk 86 mak partisipa iha sesaun importante ida ne’e.
This post is also available in: English