Komunikadu Imprensa Ba Publikasaun Immediata
Estadus Unidus no Timor-Leste Halo Parseiria hodi Lansa Inisiativa Xave Anti-Korrupsaun
Dili, 22 jullu 2024 — Ohin, Embaixada Estadus Unidus Amérika, liuhosi Ajénsia Estadus Unidus ba Dezenvolvimentu Internasionál (USAID) no Gabinete Provedór Direitus Umanus no Justisa Timor-Leste (PDHJ) asina formálmente Deklarasaun Kooperasaun ne’ebé trasa esforsu hamutuk atu hadiak liu tan governasaun no hametin PDHJ nia kapasidade hodi kumpre nia mandatu konstitusionál.
Deklarasaun ne’e hatuur baze kooperasaun entre PDHJ no USAID atu hametin mandatu responsabilizasaun instituisaun nian no hadi’a nia kapasidade hodi mitiga korrupsaun. Ne’e inklui apoiu ba PDHJ nia planu estratéjiku, dezenvolvimentu kapasidade peskiza hodi monitoriza korrupsaun, implementasaun programa edukasaun sívika no anti-korrupsaun, no hasa’e abilidade PDHJ nian hodi responde ba keixa sidadaun sira nian.
“Asinatura ohin nian subliña importánsia hosi parseria sira iha luta hasoru korrupsaun. Ami valoriza ami nia kolaborasaun ho PDHJ no komprometidu atu fó apoiu ba povu Timor-Leste,” hateten Diretór Misaun USAID Robert Barton.
“Gabinete PDHJ, komemora tinan ida ne’e ninia aniversáriu ba dala 20, iha pozisaun di’ak atu sai nu’udar ai-riin ida ba demokrasia nasaun joven ida ne’e nian, defensor ba direitus umanus no katalizadór ba governasaun di’ak no hamenus korrupsaun,” dehan Provedór, Virgilio Guterres.“Asinatura ba Deklarasaun Kooperasaun ida ne’e sei harii baze ida ne’ebé metin ba esforsu konsertadu ho ami nia parseiru USAID. Kooperasaun ne’e koloka PDHJ nu’udar instituisaun ida ne’ebé iha estatura, importánsia, no influénsia atu promove transparénsia no responsabilizasaun ne’ebé boot liu, no foka liu ba ema. Polítika no programa públiku sira, no fó kbiit ba komunidade atu ezije governasaun di’ak hosi ninia ofisiál sira. Ami agradese ba Governu Estadus Unidus, ba ninia apoiu liuhosi Atividade Mekanizmu Responsabilidade no Integridade ne’ebé finansia hosi USAID.”
Asisténsia ne’e sei koordena husi USAID/Timor-Leste nia atividade Mekanizmu Akuntabilidade no Integridade (AIM). AIM, programa ida besik millaun $7.9 ne’ebé lansa iha fulan-Abril, marka pasu sentrál ida iha apoiu governasaun USAID nian iha Timor-Leste, tanba buka atu hametin ekosistema responsabilizasaun governu nian no avansa esforsu sira hasoru korrupsaun. PDHJ hanesan parte interesada xave ida iha serbisu ida-ne’e.
This post is also available in: English