Dili, 16 Jullu 2024 – Provedór ba Direitus Umanus no Justisa, Virgílio da Silva Guterres ‘Lamukan’, husu ho urjénsia ba Ministra Saúde ho nia ekipa hodi haree ba kestaun urjente sira ne’ebé afeta ospitál sira iha Timor-Leste. Ko’alia iha Hotel Timor iha loron 10 fulan-jullu, Guterres subliña situasaun nia gravidade, hodi hatete katak, “Ita labele husik situasaun iha ospitál sira sai aat liután.” Nia hatudu preokupasaun klean kona-ba situasaun atuál ospitál, hodi repete preukupasaun hosi entidade sira seluk: “Prezidente Repúblika no entidade sira seluk mós hato’o ona sira nia preokupasaun sira”.
Guterres divulga katak grupu traballu ida ne’ebé estabelese hosi PDHJ halo hela investigasaun ativu ba asuntu ne’e no antisipa atu fó rekomendasaun ba governu iha tempu badak. Nia subliña situasaun nia gravidade, hodi nota, “Ami nia entrevista ho médiku sira no eis-jerente sira fó ona hanoin sira ne’ebé valiozu mai ami.” Guterres subliña importánsia hosi atensaun imediata governu nian, hodi subliña katak, “PDHJ sei finaliza nia rekomendasaun sira bazeia ba deskobrimentu sira hosi ekipa investigasaun nian.”
Kona-ba falta ai-moruk nian, Guterres enfatiza estratéjia jestaun nian ne’ebé susesu iha pasadu: “Iha pasadu, iha rede fornesedór permanente haat to’o lima estabelese ona hodi garante disponibilidade ai-moruk nian.” Maibé, mudansa sira foin lalais ne’e iha métodu sira aprovizionamentu nian perturba ona rede ida-ne’e, hodi hamosu dezafiu sira iha distribuisaun ai-moruk nian. Nia subliña, “Asuntu ne’e la’ós de’it kona-ba disponibilidade maibé mós kona-ba asegura katak ospitál sira simu ai-moruk sira ne’ebé sira presiza urjentemente.”
Iha konkluzaun, Virgílio da Silva Guterres realsa kona-ba nesesidade krítiku ba asaun urjente husi governu hodi rezolve dezafiu kuidadu saúde sira-ne’e, hodi garante katak ospitál sira hetan apoiu nesesáriu hodi hadi’a kondisaun operasionál sira no fornese kuidadu adekuadu iha nasaun tomak.
This post is also available in: English