Semana ida ne’e durante loron tolu hahu husi 19 to’o 21 juñu, ekipa formadór PDHJ partilla informasaun sira relasiona ho prinsípiu governasaun di’ak no direitus umanus ni’an ba titulár kargu sira ne’ebé hala’o kna’ar iha administrasaun públika munisípiu Liquiça ni’an.
Atividade sensibilizasaun ne’e nia objetivu maka atu konsiensializa titulár kargu sira kona-ba kultura servisu ida ne’ebé respeita direitus umanus, estadu direitu no prinsipius governasaun di’ak.
Provedór-Adjuntu ba Governasaun Di’ak, Rigoberto Monteiro rekoñese katak formandu sira ne’e maka autór ba protesaun direitus umanus liu husi sira nia kna’ar ne’ebé sira halo loro-loron.“Uituan ká barak, ita boot sira ne’ebé durante ne’e serbi ita nia sosiedade ho dignu, ita boot sira sai ona autór ba promosaun direitus umanus iha Liquiça,” nia hateten.
Monteiro apela ba kargu diresaun no xefia sira iha administrasaun munisípiu Liquiça atu aproveita ho máximu formasaun ne’e, nune’e sira bele intende didi’ak no implementa prinsípiu governasaun di’ak no direitus umanus iha sira nia servisu fatin.
This post is also available in: English