Viqueque – Selebrasaun loron internasional direitos umanus iha loron 10 fulan Dezembru 2016 ba dala 68, Provedoria dos Direitos Humanos e Justiça (PDHJ) komemora hamutuk ho komunidade sira iha Suco Dilor, Posto Administrativu Lacluta, Munisipiu Viqueque. Iha selebrasaun ne’e, PDHJ fó prémiu direitus umanus ba Polisia Nasional Timor-Leste (PNTL) husi Munisipiu Viqueque no Munisipiu Ermera, tanba iha baze de dadus Provedoria nian durante tinan ida nia laran hahu husi loron 1 fulan Novembru tinan 2015 toó loron 1 fulan Novembru 2016 la iha keixa husi komunidades sira hasoru membrus PNTL husi Munisipiu Viqueque no Munisipiu Ermera kona-ba indikasaun violasaun direitus umanus, kompara ho Munisipiu sira seluk.
Provedor hatutan, liu husi premiu direitus umanus ne’e nudar meus ida hodi fó motivasaun ba membrus PNTL sira hotu iha territoriu Timor-Leste, liu-liu iha Munisipiu 2 ne’ebé mak simu premiu ne’e hodi bele serbi diák liu tan komunidade sira ho profesionalismu tuir lei no ordem ne’ebé iha.
Provedor dehan tan katak, ho imi (polisia red) nia profesionalismu hodi proteje direitus umanus, signifika katak membrus PNTL hatudu duni profisaun nudar polisia hodi proteje ita hotu nudar komunidade nia direitu, se sira la hatudu sira nia profisaun hanesan PNTL, entaun kazu ruma ne’ebé mak mosu iha komunidade nia let, sira sei la marka prezensa hodi atua problema ne’ebé mosu
Iha fatin hanesan, reprezentante Komandante PNTL Munisipiu Viqueque no atual Komandante Esquadraun Polisia Posto Administrativu Lacluta sente urgullu ba premiu ne’ebe simu husi instituisaun direitus umanus hanesan Provedoria tanba bele fó motivasaun ba ami nudar servidor do povu, atu nune’e bele serbi diák liu tan povo no nasaun ida ne’e.
Komandante ne’e mos, fó korajen nafatin ba ema hotu nudar Timor oan atu hamutuk hodi promove direitus umanus ba futuru, atu nune’e, ita bele tane a’as valor direitus umanus no dignidade nudar sidadaun Timor oan, tanba ita hotu mesak Timor oan deit, se la’os ita se tan mak atu promove direitus umanus no se la’os agora, bainhira tan?.