Dili : Iha loron 10 fulan Dezembru tinan 1948, Nasoes Unidas hatoo Deklarasaun Universal konaba Dirretus Umanus no agora selebra ba dala 68 iha Munisipiu Viqueque, Postu Administrativu Lacluta, Suco Dilor. Iha ona konkordansia liu husi prinsipiu fundamental balu no provisaun legal ne’ebé dezeña atu proteje no promove direitu sivil, politiku, ekonomiku, social no kultura. Iha loron internasional ida ne’e, ema hotu-hotu bele rekoñese sira nia direitu hodi bele goza tuir lei no kultura ne’ebé eziste iha Timor-Leste.
Prevedor Direitus Humanus no Justisa (PDHJ) Dr. Silverio Pinto Baptista hateten katak, tinan ida ne’e, instituisaun Provedoria núdar orgaun independente ho nia mandatu hodi proteje no promove direitus umanus no promove governasaun di’ak, nomos ho ninia kna’ar tolu mak hanesan halo promosaun no edukasaun, investigasaun no fiskalizasaun no advokasia, sei selebra loron direitus umanus hamutuk ho komunidade sira iha Suco Dilor. Ho objetivu atu hakbesik an no hametin relasaun entre PDHJ ho Komunidade sira iha baze liu-liu ba komunidades sira iha Suco Dilor ne’e rasik.
Provedor hatutan katak, atividades ne’ebé atu halao iha loron importante ne’e mak hanesan pinta dezenhu, nata krupuk, nata berlindus no halai karong ba estudantes Eskola primaria, dansa kultura ba estudantes Pre-Secundaria, diskursu ba estudantes Secundaria, tebe dai entre aldeia ferik no katuas, dada tali entre aldeia, volibol ba feto no mane entre PDHJ, juventude no PNTL.