Dili : iha loron 30 Novembru 2016, Provedoria dos Direitus Humanus e Justça (PDHJ) no Sentru Estudu ba Dame no Dezenvolvimentu (CEPAD) asina nota entendimentu.
Nota entendimentu ne’e asina husi Provedor de Direitos Humanos e Justiça Dr. Silverio Pinto Baptista no Diretór Ezekutivu CEPAD Dr. João Boavida.
Provedor Dr. Silverio Pinto Baptista iha nia intervensaun hateten katak objetivu husi asina nota entidementu ne’e, atu establese mekanizmu ba kolabarasaun entre PDHJ no CEPAD iha area prevene korupsaun no promove governasaun di’ak iha nasaun Timor-Leste. Nomos atu haforsa servisu hamutuk entre CEPAD no PDHJ liu husi inkontru trabalhu, hafahe ba malu informasaun no esperiensia, kordena atividade ruma mak instituisaun rua ne’e bele hetan malu iha fatin ruma iha nivel munisipiu, nivel rejional no nasional hodi hala’o treinamentu ruma, ka hafahe ba malu material ruma ho objetivu ba haforsa demokrasia no promove governasaun di’ak ho transparensia no responsabilidade iha nivel instituisaun no iha luta kontra korupsaun.
Provedor hatutan tan, serimonia asina MoU ne’e, hanesan passu importante ida hodi hametin liu tan kolaborasaun servisu entre instituisaun estadu ho parte sociadade civil, tanba instituisaun Provedoria iha dever ida atu halo kolaborasaun servisu ho parte hotu-hotu tantu husi parte estadu nomos husi parte sociadade civil.
Provedor relebra hikas katak, akordu koperasaun ne’e hanesa parte ida atu formaliza kolaborasaun servisu maibe iha servisu balun ne’ebé instituisaun rua ne’e implementa ona iha passadu.
Provedoria hanesan instituisaun estadu hamutuk ho CEPAD ne’ebé mai husi parte sociadade sivil hodi hatudu komprimisiu diak hodi kombate korupsaun no promove governasaun di’ak iha nasaun demokratika ne’e.
Akordu koperasaun servisu hamutuk entre instituisaun Provedoria ho CEPAD nia durasaun ba tinan 2 no sei iha posibilidade atu amenta tan wainhira parte rua iha konkordansia. No mos serimonia ne’e partisipa husi Adjuntu Provedor ba area Direitus Umanus Dr. Horacio de Almeida, Adjunta Provedor ba area Governasaun Di’ak, Dra. Jesuina M. F. Gomes, MPA. Secretario Ezekutivu, kargus Diretores iha instituisaun Provedoria no ekipa tekniku sira husi PDHJ no CEPAD.