Dili – Relasiona ho atividade treinamentu konjunta ne’ebé hala’o ona iha tinan 2014, husi koperasaun ho servisu hamutuk entre Instituisaun Provedoria dos Direitos Humanos (PDHJ), Inspesaun Jeral Ministério Edukasaun (IJ-ME) no Inspesaun Jeral Estadu (IJE) ba etapa daruak (II) realiza tiha ona kapasitasaun ba kargus diresaun no xefias Munisipiu 12 no Rejiaun Administrativa Espesial Oe-cusse Ambeno (RAEOA).
Iha loron 19 Novembru 2015, Departamentu Promosaun no Edukasaun Diresaun Boa Governasuan (DPE-BG) realiza mini seminariu ho objetivu atu hato’o rezultadu servisu atividade treinamentu hamutuk 2014 no entrega relatoriu atividade treinamentu hamutuk ba Instituisuan PDHJ, ME no IJE no mos ba Diretor Edukasuan no Superintendente Eskolar sira.
Adjunta Provedor ba área Boa Governasuan Sra. Jesuina M. F. Gomes, MPA iha abertura hateten, objetivu treinamentu hamutuk ne’e, atu nune’e funsionáriu edukasaun nian (direjentes nivel Munisipius) bele kompriende oinsá atu hamutuk promove governasaun di’ak iha servisu administrasaun públiku, no partisipante sira bele hatene kle’an konaba papél PDHJ, IJE, no IJ-ME atu halo kontrolu ne’ebé di’ak ba iha administrasaun públiku. Nune’e mos atu hakbi’it koñesmentu partisipante sira konaba oinsá bele identifika aktu ne’ebé hadalan administrasaun di’ak liu-liu violasaun boa governasaun, atu nune’e, bele servi ho integridade no responsabilidade iha administrasaun públika, tuir lei ne’ebé regula kona-ba prosedimentu administrativu nian.
Iha fatin hanesan, Ofisial Promosaun no Edukasaun Sra. Joanita Silva da Costa, aprezenta relatorio jeral treinamentu konjunta ne’e ba partisipantes sira. Iha aprezentasaun ne’e, Ofisial Promosaun no Edukasuan esplika katak, durante treinamentu konjunta ne’e ba dirijentes Ministerio da Edukasaun iha Munisipius iha vantajen no dezafius.
Vantajen husi treinamentu ne’e mak dirijente sira transforma-an no kompriende kona-ba oinsá bele jere administrasaun ho di’ak, efikaz no efisiente, no mos partisipante sira iha duni koñesimentu no kompriende kona-ba servisu instituisaun PDHJ, IJE no IJ-ME.
No mos nia dezafius mak hamosu insatisfasaun ba partisipante sira balun, tanba la konsege espresa sira nia dúvidas kona-ba matéria ne’ebé aprezenta husi fasilitadór sira relasiona ho tempu ne’ebé la sufisiente no mos durante implementasaun programa treinamentu konjunta ne’e hatudu katak seidauk bele fó garantia no asegura balansu jéneru entre mane-feto tanba kargu xefia sira iha eskola maioria mane mak okupa.
Iha oportunidade ne’e mos, Sra. Elsa M. A. Verdial entrega simbolikamente relatoriu jeral treinamentu konjunta tinan 2014 ba Instituisaun PDHJ ne’ebé reprezenta husi Adjunta Provedor Boa Governasuan, Ministério Edukasaun (ME) reprezenta husi Vice Ministro Ministério Edukasaun, no reprezentante husi Inspetor Jeral do Estado.