Date ; 13-09-2012
Dili– Provedoria dos Direitus Humanus e Justiça (PDHJ) hanesan instituisaun independente ne’ebe iha kna’ar importante atu promove no proteje direitus humanus e promove boa governasaun. Nune’e mak PDHJ liu husi Diresaun Nasional Boa Governasaun, Departamentu Promosaun no Edukasun, iha loron 12 Setembru fahe materia Boa Governasaun ba funsionariu publiku husi Ministerio da Edukasaun konaba papel PDHJ nian no prinsipiu baziku boa governasaun iha salaun Adjassente Ministerio Edukasaun Vila -Verde Dili.
Adjunto Provedor Boa Governasaun, Dr. Rui Pereira dos Santos iha abertura hateten objetivu husi aktividade ne’e atu fahe informasaun ba malu konaba prinsipiu baziku boa governasaun, tanba iha lei hateten mos katak instituisaun PDHJ iha kna’ar importante ida atu tau matan ba servisu funsionariu publiku hotu no laos deit tau matan no investiga deit, maibe hare mos ba buat ne’ebe lao iha administrasaun publiku la tuir lei ne’ebe iha presiza kolabora hamutuk hodi hadia.
Adjunto esplika ba partisipantes sira katak, tuir planu PDHJ sei halo Memorandum of Undestending (MoU) ida ho Ministerio da Edukasuan hodi servisu hamutuk, oinsa atu habelar informasaun no mos fo treinamentu ruma konaba servisu inspectores jeral sira, servisu ba monitor escolar sira nian, liu-liu ba ema sira ne’ebe agora dadaun ne’e sai hanesan edukadores iha nivel Distrito no nivel Sub-Distrito, atu nune’e bele dezenvolve setor edukasaun diak liu tan iha futuru.
Aliende ne’e mos, Adjuntu Provedor reforsa katak, servisu importante ida husi PDHJ mak simu kesar husi cidadaun hotu, investiga no rekomenda ba Ministerio ka ou instituisaun estado nian atu implementa rekomendasaun PDHJ nian.
“Iha tinan 2011 to’o agora, PDHJ simu keixa barak husi Ministerio da Edukasaun, tantu keixa hasoru profesores sira no directores sira”, esplika Adjuntu Provedor.
Iha fatin hanesan, Director Nasional Boa Governasaun, Ambrosio Graciano Soares esplika katak, aktividade ida ne’e planeadu tiha ona husi Diresaun Boa Governasun atu fahe informasaun ba Ministerio hotu-hotu iha V Governo Konstitusional.
Aktividade fahe materia Boa Governasaun ba funsionariu publiku iha Ministerio da Edukasaun officialmente loke husi Inspektora Jeral Ministerio da Edukasaun, Sra. Elsa Verdial.