Oé-Cusse, 18–19 Setembru 2026 – Sekretáriu Ezekutivu Provedór ba Direitus Umanus no Justisa (PDHJ), Ambrosio Graciano Soares, sai nu’udar oradór iha Semináriu Rejionál ida kona-ba “Promove Governasaun Diak: Integridade Ajente Estadu Jodi Jere Rekursu sira ho Efisensia no Efikasia iha Servisu Administrasaun Publika”Semináriu ne’e organiza hamutuk husi Provedoria Direitus Umanus no Justisa (PDHJ), Komisaun Funsaun Públika (CFP), no Rejiaun Administrativa Espesiál Oé-Cusse Ambeno (RAEOA), ne’ebé halibur partisipante hamutuk 184.
Iha ninia aprezentasaun, Soares introdús kona-ba baze legál, mandatu, vizaun no misaun PDHJ nian, destaka ninia knaar nu’udar instituisaun independente ne’ebé responsavel ba promove no proteje direitus umanus, promove governasaun di’ak, salvaguarda estadu direitu no reparasaun injustisa. Nia subliña tan katak governasaun di’ak nu’udar responsabilidade hamutuk ne’ebé envolve instituisaun governu, sosiedade sivíl, setór privadu no sidadaun sira.
Aprezentasaun ne’e destaka prinsípiu xave sira governasaun di’ak nian, inklui transparénsia, responsabilizasaun, resposta, partisipasaun, ekuidade no inkluzividade, estadu direitu, efisiénsia no efikásia, no integridade. Soares realsa, funsionáriu públiku sira iha responsabilidade atu hala’o kna’ar ho integridade no jere rekursu públiku ho kuidadu no responsabilidade ba povu nia di’ak.
Semináriu ne’e inklui mós estudu kazu prátika ida kona-ba violasaun governasaun di’ak, ne’ebé foka ba asuntu sira ne’ebé envolve autoridade públika, aprovizionamentu, konflitu interese potensiál no utilizasaun rekursu públiku ba objetivu privadu. Partisipante sira hetan konvite atu identifika no analiza posivel violasaun no responsabilidade sira ne’ebé envolve, hodi reforsa importánsia integridade, legalidade, transparénsia no responsabilizasaun iha administrasaun públika.
This post is also available in: English