Gleno, 2 Agostu 2024 – Provedóra-Adjunta ba Direitus Umanus, Maria Marilia da Costa, louva Haktanek Direitu Sidadaun (HDS) ba susesu kompleta programa formasaun kulinária durante fulan ida ba prizioneira feto sira iha Prizaun Gleno.
Iha lia menon maktaka, Provedóra-Adjunta Marilia elojia HDS ba sira nia inisiativa ne’ebé iha impaktu. “Nu’udar Provedóra-Adjunta ba Direitus Umanus, ha’u sente orgullu tebes ho HDS tanba implementa programa formasaun kulinária ida ne’ebé úniku no iha valór ba ita-nia dadur feto sira,” nia hatete. “Programa ida-ne’e hanesan pasu krusiál ida hodi hasa’e abilidade feto sira nian iha Prizaun Gleno. Husi perspetiva direitus umanus, prizaun ténke kona-ba reabilitasaun, la’ós de’it kastigu.”
Marilia subliña mós esforsu kolaborativu sira entre organizasaun no instituisaun oioin. “Tinan ida ne’e, Asosiasaun HAK, PDHJ, HDS, Alfela, Pradet, Klínika Bairo Pite, JSMP, SHC, Ministériu Solidariedade no Inkluzaun Sosiál no Ministériu Justisa hamutuk ona iha Rede Apoiu Servisu Prizionál,” nia esplika. “Rede ne’e kria atu rasionaliza mekanizmu fahe informasaun no prevene duplikasaun programa husi ONG no ministériu sira. Ami halibur dala rua ona iha tinan ida-ne’e hodi rezolve dezafiu sira, avalia progresu, no dezenvolve solusaun sira.”
Bainhira dirije ba feto na’in 19 ne’ebé partisipa iha formasaun, Provedóra-Adjunta enkoraja atu utiliza sira nia abilidade foun. “Ita labele sente mesak. Ami, hamutuk ho ita nia instituisaun públika no parseiru sosiedade sivíl sira, iha kompromisu atu apoia ita-boot. Ami servisu hamutuk atu ajuda ita-boot sira nia moris iha faze tuirmai hafoin kumpri ita nia sentensa,” nia hatete.
Serimónia enserramentu hala’o iha Salaun Enkontru Prizaun Gleno no hetan partisipasaun husi reprezentante sira husi Gabinete Apoiu Sosiedade Sivíl (GASC), Diretór HDS, Diretór Prizaun Gleno, no Asosiasaun HAK, entre sira seluk.
Provedór Direitus Umanus ba Justisa iha knaar krusiál hodi tau matan ba funsionamentu prizaun sira-nian, hodi garante katak maski iha restrisaun ba sira-nia liberdade, prizioneiru sira hetan tratamentu ho dignidade no respeitu hosi estadu.
This post is also available in: English