Baguia, 24 Outubru 2024 – Provedór-Adjunta Direitus Umanus, Maria Marilia da Costa, husu ba lideransa komunitária sira iha Postu Administrativu Baguia Munisípiu Baucau atu tau prioridade ba protesaun direitus umanus. Nia destaka importánsia atu respeita direitu individuál sira no fornese servisu sira ne’ebé promove governasaun di’ak.
“Mensajen kona-ba proteje direitus umanus ne’e krusiál ba ema hotu. Esensiál atu respeita direitu ema ida-idak nian no apoia esforsu sira atu implementa governasaun di’ak iha ita-nia suku no komunidade sira-nia laran,” afirma Provedóra-Adjunta Marilia durante sesaun formasaun ba lideransa komunitária sira iha Baguia iha Tersa (10/22/2024).
Nia subliña katak líder komunitáriu sira hala’o papél importante ida hodi rezolve preokupasaun no dezafiu sira iha baze, partikularmente hodi tulun rezidente sira ho prosesamentu dokumentu sira iha sede suku nian. “Sira nia involvimentu iha formasaun ne’e sai hanesan xave atu hasa’e sira nia koñesimentu no kapasidade atu promove no proteje direitus umanus, nune’e mós atu haburas governasaun di’ak iha atendimentu públiku iha nível suku,” nia akresenta.
Iha eventu hanesan, Administradór Postu Baguia Mário Xavier da Silva hato’o agradesimentu lori partisipante sira nia naran ba PDHJ nia inisiativa hodi fahe koñesimentu ne’ebé iha valór ba lideransa komunitária sira. “Ha’u agradese ba PDHJ mai iha Postu Administrativu Baguia hodi fó formasaun kona-ba promove no proteje direitus umanus no hasa’e governasaun di’ak iha atendimentu públiku iha nível suku,” nia dehan.
Nia enkoraja partisipante sira atu partisipa ativu iha formasaun ne’e hodi serve di’ak liután sira-nia komunidade.
Formasaun ne’e loke husi reprezentante Prezidente Autoridade Munisípiu Baucau, Cesaltina Maria de Jesus, no hala’o husi Provedoria Direitus Humanus no Justisa (PDHJ). Formasaun ne’e konta ho treinadór sira husi Delegasaun Territoriál PDHJ Baucau, ne’ebé lidera husi Joanita Silvira da Costa ho nia ekipa. Formasaun ne’e hala’o durante loron tolu, hahú hosi loron 22 to’o loron 24 fulan-outubru tinan 2024, iha Salaun Postu Administrativu Baguia, ho partisipasaun hosi líder komunitáriu no ofisiál administrasaun na’in 46.
This post is also available in: English