Dili, 29 Janeiru 2025 – Provedór Direitus Umanus no Justisa, Virgílio da Silva Guterres ‘Lamukan’, hasoru malu ohin ho Embaixadór Suisa ba Indonézia, Timor-Leste, no ASEAN, Olivier Zehnder, iha eskritóriu Provedór nian iha Dili.
Enkontru ne’e foka ba troka informasaun kona-ba serbisu Provedór no Embaixada Suisa nian, partikularmente iha área direitus umanus, governasaun di’ak, no demokrasia.
Durante diskusaun, Provedór destaka mandatu konstitusionál PDHJ ni’an ba Protesaun Direitus Umanus no Promosaun Boa Governasaun. Nia elabora kona-ba serbisu instituisaun nian ho entidade públika sira hodi garante adezaun ba padraun governasaun di’ak no respeitu ba direitus umanus. Adisionalmente, nia deskreve PDHJ nia esforsu kooperasaun internasionál ho organizasaun sira hanesan Komisaun Intergovernamentál ASEAN kona-ba Direitus Umanus (AICHR), Fórum Nasionál Instituisaun Direitus Umanus Sudeste Aziátiku (SEANF), Aliansa Globál Instituisaun Nasionál Direitus Umanus (GANHRI), no Ázia Fórum Pasífiku (APF), fó énfaze ba kolaborasaun rejionál no internasionál kona-ba direitus umanus.
Virgílio mós ko’alia kona-ba Provedór nia knaar atu hala’o revizaun judisiál ba lei sira ne’ebé potensialmente viola direitu fundamentál sira. Nia nota katak iha tinan kotuk, PDHJ hato’o kazu revizaun judisiál sanulu ba Supremu Tribunál hodi halo avaliasaun.
Aleinde ne’e, enkontru ne’e kobre asuntu oioin sosiál, ekonómiku, kulturál, no edukasionál iha ámbitu direitus umanus nian.
Tópiku prinsipál ida ba diskusaun maka kooperasaun trilaterál entre Ministériu Justisa Timor-Leste, Provedór ba Direitus Umanus no Justisa (PDHJ), no Asosiasaun ba Prevensaun Tortura (APT) iha esforsu atu prevene tortura iha Timor-Leste . Espesifikamente, inisiativa ne’e foka ba dezenvolve módulu formasaun ba guarda prizionál sira.
Provedór fahe rezultadu pozitivu husi kolaborasaun ida-ne’e, hodi destaka katak relatóriu tinan kotuk indika violasaun direitus umanus zero relasiona ho konduta guarda prizionál. Nia espresa otimizmu kona-ba kontinuasaun parseria, la’ós de’it iha área formasaun guarda prizionál sira maibé mós habelar ba polísia, iha ne’ebé preokupasaun kona-ba violasaun direitus umanus sei signifikativu nafatin.
Embaixadór Olivier Zehnder louva Timor-Leste tanba ninia kompromisu maka’as ba demokrasia no direitus umanus iha rejiaun ne’e. Nia mós elojia Provedór nia serbisu no espresa interese Suisa nian ba kooperasaun liután iha futuru.
Enkontru ne’e hetan partisipasaun husi Provedóra- Adjunta Direitus Umanus, Maria Marilia da Costa; Adjuntu Divizaun Polítika, Ekonómika, no Kulturál no Sekretária Dahuluk Embaixada Suisa nian, Tessa Nerini; nune’e mós Filomena, Xefe Unidade Asistensia Jurídika, Administrasaun, Peskiza no peskija no Olga Sequeira, Ofisiál Relasaun Públika.
This post is also available in: English