Ave Caicoli, Dili, Timor-Leste

info@pdhj.tl

  • tp

pdhj timor-leste lidera south east asia national human rights institutions forum (seanf)

Date  : 18-09-2012

Enkontru anual South East Asia National Human Rights Institutions Forum (SEANF) ba dala 9 iha Chiang Mai Thailandia ne,ebé partisipa mos husi Provedor de Direitos Humanos e Justiça (PDHJ) Dr. Sebastião Dias Ximenes no Directur Jeral, inklui funsionariu PDHJ nain ida, Forum ne’e deside PDHJ maka sei lidera SEANF durante tinan ida (2012-2013).

Enkontru ne’e halaó iha loron 12-14 Setembru 2012 ne’ebé partisipa husi instituisaun nasional ba direitos humanos ne’ebé sai ona membru permanente SEANF nian, hanesan Timor-Leste, Indonezia, Filipina, Thailandia, Malaysia no Myanmar (Birma).

Dr. Sebastião Dias Ximenes, Provedor hateten katak, objetivu husi enkontru ne,e hodi diskuti regulamentu SEANF no issu direitus umanus ne,ebé importante no prioridade ba membrus SEANF hodi halo prevensaun no promove direitus umanus tuir situasaun kada nasaun nian.

Iha enkontru ne’e kada instituisaun nasional direitus umanus kada nasaun fahe informasaun kona-ba esperiensia halo prevensaun no protesaun direitus umanus liu-liu issu sira ne,ebé identifika ona. Topiku iha enkontru ne’e kona-ba edukasaun direitus umanus, tortura, detensaun, direitu ba desenvolvimentu no direitu ba ambiente, direitus ba ema indigina, trafiku umanu no direitus trabalhador migrantes.

Provedor, rekoñese katak enkontru ne’e importante tanba PDHJ sai ona membru permanente SEANF tinan 2010, ne,ebé iha obrigasaun atu partisipa iha enkontru refere kada tinan hodi diskuti issu-issu tematiku direitus umanus ne’ebé relevante ba situasaun kada nasaun ida-idak nian.

Liu husi enkontru ne,e, Forum Nasional Direitos Humanos hotu-hotu deside no simu aplikasaun Komisaun Nasional Direitos Humanos Myanmar sai membru SEANF, tanba Komisaun Nasional Direitos Humanos Myanmar prenxe ona criteria SEANF nian.

Provedor ne’ebé sai Prezidente ba Forum SEANF ne,e hateten PDHJ sei lidera SEANF, ida ne,e desizaun husi membros SEANF nian ne,ebé hotu-hotu konkorda katak, SEANF iha tinan 2012-2013 entrega lideransa ba PDHJ Timor-Leste hodi lidera SEANF durante tinan ida. Durante tinan ida nia laran sei hala’o enkontru hodi diskute issu-issu direitus umanus ne,ebé relevantes no mos atu hametin kooperasaun no servisu hamutuk iha região ASEAN.

Dr. Sebastião hatutan katak, ho membrus SEANF nia kónfiansa ba PDHJ hodi sai lideransa ba SEANF durante tinan ida 2012-2013 ida ne,e orgullu bo’ot ida ba Timor-Leste espesialmente PDHJ hanesan instituisaun Nasional direitus umanus. Embora Timor-Leste seidauk sai membro ASEAN nian maibe PDHJ integra ona iha Forum Instituisaun Nasional Direitos Humanos ASEAN nian.

PDHJ hetan konfiansa husi membros SEANF atu lidera Forum ne,e, tanba ne,e PDHJ tenki esforsa a’an atu sai uma nain di’ak ba reuniaun Forum ne,ebé sei hala’o iha Dili iha tinan oin mai, la’os de’it enkontru anual maibe mos enkontru grupu de trabalho Forum nian ne,ebé sei hala’o mos iha Dili.

Entretantu Forum mos deside atu halo aproximasaun ba Paises ASEAN sira ne,ebé seidauk iha Instituisaun Nasional Direitos Humanos atu enkoraja sira hodi hari’i lalais Instituisaun Nasional Direitos Humanos iha ida-idak nia Nasaun.

 

Presiza Informasaun Kontaktu Lady Ximenes, Relasaun Públika PDHJ

Ho númeru telemovel: +670 77304260 ou liu husi email; ladynhaximenes@yahoo.co.id

Notisia seluk

Provedór Husu Governu Atua Preukupasaun Públiku Kona-ba Problema Saúde

Dili, 16 Jullu 2024 - Provedór ba Direitus Umanus no Justisa, Virgílio da Silva Guterres ‘Lamukan’, husu ho urjénsia ba Ministra Saúde ho nia...

PDHJ Timor-Leste Organiza Enkontru Grupu Traballu Tékniku SEANF Daruak Kona-ba Direitus Umanus

Husi loron 10-11 fulan jullu tinan 2024, Provedoria Direitus Umanus no Justisa (PDHJ) Timor-Leste sai uma nain ba Enkontru Grupu Traballu Tékniku Daruak Fórum...

PDHJ Apela Promove Sosiedade Inkluzivu iha Komemorasaun Loron Nasionál Ema ho Defisiénsia

Dili, 4 jullu 2024 – Provedóra-Adjunta Direitus Umanus, Maria Marilia da Costa, apela ba entidade hotu-hotu atu promove sosiedade Timor-Leste ida ne’ebé inkluzivu liu...

Provedóra-Adjunta Direitus Umanus, Partisipa iha Enkontru ba Estabelesimentu Inter-NHRI Inquiry Mechanism

Quezon, Filipina, 26-27 juñu 2024 – Provedóra-Adjunta ba área Direitus Umanus Maria Marilia da Costa ho Ofisiál Investigasaun Valerio Magno Ximenes, partisipa iha enkontru...