Manatuto : Durante loron 3 hahu husi loron 20 to’o 22 Fevereiru 2018, Ofisial Provedoria dos Direitos Humanos e Justiça (PDHJ) Diresaun Nasional Promosaun realiza atividade sosializasaun Direitus Umanus (DU), Diretu Labarik (DL) no Tráfiku Umanu (TU) ba estudantes Eskola Sekundaria Katolika São Francisco de Assis Natarbora, Eskola Sekundaria Katolika Dom Basilio do Nascimento Laclubar no Eskola Tékniku Professional ka SPP Natarbora Munisipiu Manatuto.
Materia sosializasaun ba estudantes sira mak hanesan “Kna’ar Provedoria dos Direitus Humanos e Justiça, Direitu Labarik no Tráfiku Umanu”.
Diretora Escola Secundaria São Francisco de Assis Natarbora, Madre Veronica FSGM iha nia abertura ba programa sosializasaun ne’e sente orgulhu ba instituisaun Provedoria nia atividade sosializasaun ne’e, tanba bele lori bantazen ne’ebé diak ba estudantes sira, atu nune’e estudantes sira bele hatene kona-ba saida mak direitus umanus no saida mak tráfiku umanu.
Entretantu Diretor Eskola Secundaria Katolica Dom Basilio do Nascimento Laclubar, Diákanu Benjamin Fernandos Soares hato’o agradesimentu ba ekipa Provedoria nian ne’ebé hakat to’o sira nia eskola hodi sensibiliza kna’ar Provedoria nian liga ba direitus umanus, direitu labarik no tráfiku umanu ba sira nia estudantes sira, atu nune’e estudantes sira hatene no iha koñesimentu kona-ba servisu Provedoria nian liu-liu kona-ba direitu estudante no dever estudante nia no mos kona-ba saida maka tráfiku umanu.
Tuir observasaun katak, durante Ofisial Diresaun Promosaun sira esplika materia kona-ba “Kna’ar Provedoria dos Direitus Humanos e Justiça, Direitu Labarik no Tráfiku Umanu”.
Estudante sira antuziasmu tebes hodi rona esplikasaun, tanba tuir estudante sira katak materia hirak ne’e hanesan buat foun ba sira, atu nune’e sira hatene klean konaba saida mak direitus umanus no saida mak tráfiku umanu. Atu nune’e sira bele prevene sira nia a’an karik iha futuru iha ema balun habosok sira nia a’an.