Data, 18-10-2007
Bazeia ba Artigu 27 Lei-Inan Timor-Leste nian, ne’ebé prevee ona kona-ba ezisténsia Provedór Direitos Humanos no Justiça nu’udar órgaun indepedente ida ne’ebé iha knaar hodi promove no protéje Direitos Humanos iha Nasaun Timor-leste.
Bazeia ba mandatu Provedoria dos Direitos Humanos e Justiça (PDHJ) nian ne’ebé iha maka PDHJ servisu hamutuk ho Asosiasaun HAK hala’o ona aprosimasaun ho grupu rua ne’ebé halo konflitu iha Viqueque sub distritu Uatulari iha fulan hirak liu ba no konkorda hamutuk ona atu halo dialogu iha tempu badak ne’e.
Bazeia ba rejultadu aprosimasaun ne’ebé iha mak husi PDHJ iha loron 19 Outubro sei hasoru malu ho Primeiru Ministru Xanana Gusmão iha palasiu do governu atu hato’o kestaun ne’e.
“Dr. Silverio Pinto Baptista Provedór Interinu hateten katak bazeia ba rejultado aprosimasaun ne’ebé iha katak grupu rua ne’ebé durante ne’e konflitu iha Uatulari konkorda hamutuk ona atu halo dialogu. Nune’e liu husi hasoru malu ho Primeiru Ministru RDTL atu informa asuntu ne’e hodi bele fó apoi ba dialogu ne’ebé sei hala’o bele hetan susesu”.
“Liu husi dalan dialogu ne’e nu’udar mekanismu ida atu nune’e bele lori fila deslokadu sira ba ida-idak nia hela fatin. Atu nune’e komunidade sira bele moris hamutuk fila fali hanesan iha tempu liu ba, hatutan Dr. Silverio”.
“Dr. Silverio espera katak liu husi enkontru ho Primeiru Ministru ne’e kuartu governu Konstitusional bele fó apoi maximu ba planu dialogu ne’ebé komunidade iha Uatulari sei hala’o”.
Persiza informasaun Kontaktu
Lady Ximenes
Informasaun & Relasaun Públika PDHJ
Telemovel 726 1843 ou 333 1071