Date ; 24-09-2012
Bobonaro – Provedoria dos Direitos Humanos e Justiça (PDHJ) liu husi Diresaun Nasional Direitus Humanus (DH), Diresaun Nasional Boa Governasaun (BG) no Diresaun Nasional Asistensia Publika (DPA), hala’o aktividades “Servisu Movel” iha Sub-Distrito Atabae, Sub-Distrito Cailako no Sub-Distrito Maliana Distrito Bobonaro, durante loron 3 hahu husi loron 17 to’o 19 Setembru 2012.
Durante fahe informasaun ba komunidade sira iha fatin 3 ne’e, PDHJ rona preukupasaun komunidades sira nian kona-ba Dezenvolvimentu nian iha Distrito Bobonaro mak hanesan, kona-ba kondisaun Estrada, Electricidade, Be’e Mos, fasilidade Saude menus, no mos equipamentus eskola nian.
Adjunto Provedor ba area Boa Governasaun, Dr. Rui Pereira dos Santos iha nia abertura hateten ba partisipantes sira katak, objetivu husi aktividade ne’e, atu hakbesik A’an ba komunidade sira hodi fahe informasaun kona-ba direitus humanus no Boa Governasaun e mos simu diretamente keixa husi komunidade sira karik iha indikasaun violasaun direitus umanus no mal administrasaun husi entidades publiku.
Adjunto Boa Governasaun mos esplika ba partisipantes sira katak, servisu importante iha PDHJ mak atu promove no proteje direitus umanus no promove boa governasaun.
Oras ne’e dadaun, PDHJ estabelese ona ninia sede regional sira iha Distrito ha’at (4) mak hanesan iha Distrito Manufahi, Bobonaro, Baucau no Distrito Oe-cusse.
Ho objetivu atu hakbesik a’an ba komunidade sira iha área remotas hodi hato’o deit sira nia keixa iha cede regional Distrito, bainhira sente katak iha entidades publiku balun viola sira nia direitu no halo abuzu de poder”, informa Adjunto Provedor ba partisipantes sira.
Durante fahe informasaun ba komunidade sira iha Distrito kona-ba servisu PDHJ nian, Adjunto Provedor husu ba komunidades sira iha área remotas katak, keta tauk atu hato’o keixa ba PDHJ bainhira senti katak iha nai ulun balun viola imi nia direitu no halo abuzu de poder, tanba estadu hari’i instituisaun PDHJ atu tau matan no kontrola servisu husi entidades publiku tomak.
“Husu mos ba komunidades sira katak, bainhira atu hato’o keixa hasoru ema ida tenki hato’o ho klaru, atu nune’e, fasil ba ekipa investigadores sira iha PDHJ bainhira presiza informasaun balun hodi kompleta keixa ne’e”, sujere Adjunto Provedor ba partisipantes sira.
Entretantu, Valerio Magno Ximenes, Direitur Nasional Direitus Humanus esplika materia direitus humanus baziku ba partisipantes sira iha baze, atu nune’e sira (komunidade Red) mos bele iha koñesimentu oituan kona-ba saida mak direitus humanus. No esplika mos diferensa entre violasaun direitus humanus no krime, no se mak sai autor ba violasaun direitus humanus no krime.
Nune’e mos Administrador Sub-Distrito Cailaco, Luis Soares Gonçalves senti kontente tebes ho prezensa husi ekipa PDHJ iha sira nia fatin hodi fahe informasun ba komunidade sira kona-ba saida mak direitus humanus no saida mak governasaun diak.
Tanba durante ne’e ninia komunidades sira seidauk hetan formasaun kona-ba área direitus humanus baziku, área governasaun diak no oinsa atu hato’o keixa ba instituisaun PDHJ.
Adjunto Administrador mos husu ba komunidades sira atu aproveta oportunidade ida ne’e ho diak hodi rona esplikasaun materia kona-ba direitus humanus baziku, governasaun diak no oinsa dalan atu hato’o keixa ba PDHJ.
Adjunto Administrador Distrito Bobonaro, Julio Carvalho Caero mos husu ba partisipantes sira, atu rona didiak esplikasaun kona-ba servisu PDHJ nian no dalan oinsa atu hato’o keixa.
“Tanba realidade hatudu katak, iha inisio hari’I kaixa keixa iha edifisiu administrasaun Distrito to’o ohin loron seidauk iha ema ida atu hatama keixa ba kaixa keixa ne’ebe iha”, hateten Adjunto Administrador.
Aktividade fahe informasaun ba komunidades sira iha Distrito Bobonaro lao hamutuk ho Comisaun Anti Corupsaun (CAC) no hetan partisipasaun husi funsionario Ministerio Agricultura e Pescas (MAP) Sub-Distrito, MAEOT Sub-Distrito, MCIA, funsionario ME no Lideransa Komunitaria.
Presiza Informasaun Kontaktu Lady Ximenes, TP Relasaun Públika PDHJ Telemovel 7304260 ou Jóse Tefa 735 1412 ou 3331071.