Date, 01-03-2010
Iha loron 23-25 Fevereiru 2010 Provedoria dos Direitos Humanos e Justiça (PDHJ) liu husi diresaun Nasionál Boa-Governasaun fahe informasaun ba lider komunitaria sira iha distritu Liquiça ho sub distritu tolu hanesan, Liquiça Villa, Maubara no Bazartete.
Materia iha workshop ne’e mak polítika PDHJ nian hodi promove Boa-Governasaun, protégé no promove direitus humanus, esperensia boa-governasaun iha mundu, papél PDHJ hodi promove prinsípiu báziku governasaun di’ak, protégé no promove direitus umanus.
“Sosializasaun ne’ebé PDHJ hala’o ne’e nia objetivo atu autoridade komunitaria no komunidade sira bele hatene no komprende kona-ba prinsípiu Governasaun di’ak. Atu nune’e autoridade komunitaria no komunidade sira bele partisipa ativu iha prosesu governasaun nia laran”.
Dr. Amandio de Sá Benevides Adjuntu Provedor ba area Boa-Governasaun hateten katak “ nu’udar lider komunitaria kuandu hala’o buat ruma presiza tuir lei ne’ebé iha atu nune’e bele iha governasaun ne’ebé di’ak. Lider komunitaria sai hanesan aman ba ema hotu-hotu nune’e presiza serbí komunidade tomak ho di’ak”.
“Lider komunitaria la’ós ukun de’it maibé sai servidores ne’ebé di’ak atu serbí komunidade tomak iha sira-nia suku no aldeia” hateten Dr. Amandio.
Entretantu Leonel de Jesus Carvalho, Administradór distritu Liquiça “ hato’o agradesimentu ba PDHJ tanba ne’e oportunidade di’ak atu bele fahe informasaun ba lider komunitaria sira hodi nune’e serbí povu ho di’ak tuir regra no lei ne’ebé vigor iha nasaun laran”.
Leonel husu ba lider komunitaria sira ne’ebé partisipa iha workshop ne’e atu bele hatutan informasaun ne’ebé sira hetan ona ba komunidade sira. Nune’e mós lider komunitaria sira presiza servisu hamutuk hodi desenvolve nasaun ne’e.
Bazeia ba Konstituisaun RDTL Artigu 27, Provedor dos Direitos Humanos e Justiça nu’udar órgaun indepedente ida iha knaar atu haree no buka hatán sidadaun sira-nia problema sakar podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali Justiça.
Presiza informasaun Kontaktu
Lady Ximenes
Informasaun & Relasaun Públika PDHJ
Telemovel 7304260 ou 333 1071