Data, 19-03-2008
Provedoria dos Direitos Humanos e Justiça (PDHJ) liu husi divizaun Direitos Humanos hala’o monitorizasaun ba situasaun seguransa iha Ermera hahú iha loron 17 fulan Marsu. Ekipa monitorizasaun kompostu husi staff PDHJ, Human Rights and Transitional Justice (HRTJS) no Asosiasaun HAK no lidera husi Dr. Silverio Pinto Baptista, adjunto Provedor. Liu husi monitorizasaun ne’e ekipa monitorizasaun atu haree direitamente situasaun atuál iha terenu bazeia ba Commando Conjunta F-FDTL no PNTL operasaun halibur 2008 nia knaar iha area ne’ebá.
“PDHJ hola inisiativa hodi halo monitorizasaun tanba tuir informasaun ne’ebé Provedoria dos Direitos Humanos e Justiça simu katak durante commando Conjunta F-FDTL no PNTL hala’o knaar iha Ermera akontese violasaun Direitos Humanos hateten Dr. Silverio Pinto Baptista, Adjunto Provedor.
Silverio hatutan “tuir informasaun ne’ebé PDHJ simu katak durante commando Conjunta hala’o knaar iha terenu liu-liu iha distritu Ermera mosu violasaun Direitos Humanos, tan ne’e liu husi monitorizasaun ne’e atu bele haree direitamente situasaun atuál no hatene loloos katak akontese duni ka lae violasaun Direitos Humanos”.
Dr. Silverio klarifika katak “Durante iha Ermera ekipa monitor sira sei halibur informasaun husi vítima, autoridade lokál sira no parte seguransa Commando Conjunta F-FDTL no PNTL”.
Ikus liu Dr. Silverio haktuir “depois de monitorizasaun iha terenu hatudu katak akontese duni violasaun direitos humanos PDHJ sei hato’o rekomendasaun ba órgaun kompetente sira”.
Bazeia ba Konstituisaun RDTL Artigu 27, Provedor dos Direitos Humanos e Justiça nu’udar órgaun indepedente ida iha knaar atu haree no buka hatán sidadaun sira-nia problema sakar podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali justiça.
Presiza informasaun Kontaktu
Lady Ximenes
Informasaun & Relasaun Públika PDHJ
Telemovel 726 1843 ou 333 1071