Dili : Loron 27 Juñu 2018, Provedor Dr. Silverio Pinto Baptista akompaña husi Provedor adjunta Dra. Jesuina Maria F. Gomes no Provedor adjuntu Dr. Horacio de Almeida inklui Xefe Gabinete Sr. Silvino Saldanha Pereira, aprejenta relatoriu anual 2017 ni’an ba Prezidente Parlamentu nasional Dr. Arão Noe de Jesus Amaral. Aprejentasaun ne’e realija iha sala audiensia Gabinete Prezidente Parlamentu nasional.
Tuir Provedor Dr. Silverio pinto Baptista katak aprejentasaun relatoriu ne’e rasik hala’o bazeia ba estatutu Provedor iha artigu 46 ne’ebé haktuir katak, tinan-tinan iha loron 30 fulan Juñu Provedor tenke aprejenta nia relatoriu ne’e ba iha Prezidente Parlamentu Nasional.
Tanba ne’e maka nia parte iha loron 27 Fulan ne’e, akompaña husi adjunto na’in rua ho xefe Gabinete marka prejensa iha Parlamentu nasional hodi entrega no esplika relatoriu annual nia konteudu ba iha Prezidente Parlamentu Nasional.
Provedor mós husu atu Prezidente Parlamentu antes tama fulan Outubru tau iha ajenda orariu ba aprejentasaun relatoriu anual PDHJ ni’an iha plenaria Parlamentu nasional. Tanba fulan Outubru hanesan fulan ikus ba mandatu Provedor ho adjuntu na’in rua ni’an iha Provedoria dos Direitos Umanus I Justisa (PDHJ).
Hatan ba pedidu sira ne’e, Prezidente Parlamentu nasional haktuir katak, iha tempu badak Provedor sei simu fali konvite ofisial husi gabinete Prezidente Parlamentu para PDHJ bele aprejenta Relatoriu iha Plenaria Parlamentu nasional.