Dili- Instituisaun Provedoria dos Direitos Humanos e Justiça (PDHJ) liu husi Diresaun Fiskalizasaun no Rekomendasaun, lansa inisiativa hodi halo monitorizasaun ba implementasaun Programa Merenda Eskolar (PME), ne’ebé implementa husi Governu liu husi Ministériu Edukasaun (ME), tanba bazeia ba servisu kooperasaun entre ME ho Provedoria hodi halo monitorizasaun ba implementasaun programa ne’e, no mos bazeia ba preukupasaun husi komunidade sira.
Provedor, Dr. Silverio Pinto Baptista hateten katak, atividade monitorizasaun ba PME, monitorizasaun ba fatin Detensaun Polisia iha Timor-Leste no mos monitorizasaun ba Prizasaun Becora no Gleno hahu kedas iha tinan 2015 to’o 2016.
Tanba ne’e, ohin (23 Setembru), Provedoria entrega no publika relatoriu inisiu monitorizasaun 3 ne’e ba Ministério Justisa liu husi Diresaun Nasional Servisu Prizaun, Ministério Interio, Ministério Edukasaun, Ministério Saúde, Polisia Nasional Timor-Leste (PNTL), Rejiaun Administrativa Espesial Oe-cusse Ambeno (RAEOA), Komisaun F Parlamentu Nasional no Defensoria Publiku, hodi hare no fó resposta ba rekomendasaun hirak ne’ebé rekomenda iha relatoriu nia laran.
Provedor esplika katak, relatoriu ne’ebé Ministériu save sira simu, no sira (Ministériu Red) sei tur hamutuk ho nia ekipa sira iha Ministériu nia laran hodi hare, diskute, implementa no fó resposta ba rekomendasaun sira iha relatoriu nia laran durante loron 60 nia laran, no depois liu loron determinadu, Ministériu sira ne’e sei hato’o fali resposta ba Provedoria, atu nune’e Provedoria bele hatene kona-ba implementasaun rekomendasaun sira ne’e.
Antes, atu entrega relatoriu inisiu monitorizasaun 3 ne’e ba reprezentante husi Ministériu save sira, ekipa monitorizasaun principal sira mak hanesan Ofisial Fiskalizasaun no Rekomendasaun, Bartolomeu Gonçalves, Sonia Fernandes no Antonino da Silva, sei esplika metodologia monitorizasaun ba partisipantes sira.
Depois simu relatoriu ne’e, Defensor Publiku, Dr. Sergio Hornai, agradese tebes ho inisiativa ne’ebé PDHJ halo, tanba ida ne’e de manda kontituisional katak lei mak fó kompetensia ba PDHJ hodi halo ida ne’e.
“Oinsa atu bele promove no garante ba iha direitu fundamental sidadaun sira nian hodi asesu justisa formal no justisa social nian”, dehan Sergio.
Ho nune’e, hodi Defensoria Publiku nia naran apresia hodi simu rekomendasaun hirak ne’e ho objetivamente. Tanba, ho ida ne’e realistiku hodi hein ba ita nia instituisaun liu-liu ba dezenvolveimentu ne’ebé avansa tiha ona iha rai laran.
Iha oportunidade ne’e mos, Reprezentante Ministério Edukasaun, Raimundu Pereira hateten katak, relatoriu husi PDHJ sai hanesan mata dalan ba ME hodi bele resolve problema merenda eskolar ne’ebé sai preukupasaun ema hotu nian.