Dili -Iha loron 15 Abril 2016, Reprezentante Presidente Komisaun Funsaun Públika, Komisario Dr. Jose Telo akompanha husi Provedor Dr. Silverio Pinto Baptista fó tomada de posse ba kargu Diresaun no Xefia sira iha Instituisaun Provedoria dos Direitos Humanos e Justiça (PDHJ) hamutuk 24 ne’ebé kompostu husi Diretor Jeral 1, Diretor Nasional 4, Diretor Delegasaun Territorial 4, Inspetor 1, no Xefia Departamentus 14.
Provedor, Dr. Silverio Pinto Baptista iha nia diskursu husu ba empossados sira ne’ebé foin simu tomada de posse atu servisu ho responsabilidade hanesan funsionarius públiku, husu mos atu hadok a’an husi kores oi-oin ne’ebé iha sociadade nia let liu-liu ba politika, no mos husu atu servisu ho koperasaun, no konsulta ba malu entre funsionariu sira no bele mos konsulta ho superior sira, wainhira hasoru difikuldades iha servisu laran.
Provedor husu nafatin ba emposados sira katak, kargu ne’ebé asumi laos gava a’an, maibe tenki dedika a’an atu servisu ho diak liu tan hodi servi ita nia komunidade ne’ebé buka lia los no justisa.
Iha oportunidade ne’e mos, Provedor hateten ba familia husi emposados sira katak, natureza servisu iha Instituisaun Provedoria la hanesan ho Instituisaun sira seluk, dala ruma iha tempu feriadu mos Instituisaun persiza hela sira atu halo servisu.
Aliende ne’e mos, Provedor agradese ba funsionariu sira ne’ebé asumi tiha ona kargu Diresaun no Xefia iha tinan kotuk atu servisu hamutuk nafatin hodi lori Instituisaun PDHJ hanesan Instituisaun independente ne’ebé temi iha Konstituisaun RDTL, hodi nune’e bele servi diak liu tan komunidade ne’ebé mukit ba justisa no lia los.
Iha fatin hanesan, reprezentante Presidente Komisaun Funsaun Públika, Komisario Dr. Jose Telo iha nia diskursu lori Komisaun Funsaun Públika nia naran hakarak kongratula funsionariu PDHJ ne’ebé hetan konfiansa husi superior maximu hodi asumu kargu Diresaun no Xefia hirak ne’e. nune’e bele dezenpenha funsaun PDHJ nian, atu asegura direitus umanus no boa governasaun iha estadu Timor-Leste, liu-liu ba funsinariu publiku, imi (emposados Red) tenki servi ho diak no hatudu profesionalismu, atu oinsa bele hetan produktividade ne’ebé efisiensia, efikasia no kualidade.
Iha serimonia tomada de posse ba kargu Diresaun no Xefia sira partisipa husi Ministro de Estado Coordenador dos Assuntos da Administração do Estado e da Justiça e Ministro da Administração Estatal, Dr. Deonísio Babo Soares, Komisariu Comissão Anti-Corrupção, Dr. Aderito Pinto Tilman, Inspetor Jeral Estado, Dr. Francisco de Carvalho, Provedor sesante Dr. Sebastião Dias Ximenes, Adjunto Provedor sesante Dr. Rui Pereira dos Santos, familia husi emposados sira no funsionarius PDHJ.
Serimonia tomada de posse ne’e mos, halo juramentu ba emposados sira ne’ebé deriji husi Diretor Jeral PDHJ, Sr. Aureo J. A. Savio no akompanha husi Padre Kapilão PNTL, Nelinho Americo Ferreira Soares.