Dr. Silverio Pinto Baptista, Provedor husu ba Monitor sira atu bele aplika matenek ne’ebé sira hetan ona durante treinamentu. Provedor hato’o lia hirak ne’e bainhira enxera programa treinamentu ba monitor sira husi Delegasaun Territorial Baucau, Same, Maliana no Oecusse iha Salaun Bibleoteka PDHJ Caicoli-Dili loron 26/2/2016.
Provedor hateten ho meius kapasitasaun bele hasa’e koñesimentu no abilidade monitor sira nian. Tanba tuir politika instituisaun nian, servisu ne’ebé durante sentraliza iha Sede Sentral PDHJ iha Dili hanesan monitorizasaun, investigasaun no promosaun edukasaun sei desentraliza ba Delegasaun Territorial sira.
Treinamentu referee fasilita husi funsionariu senior iha PDHJ kompostu husi Departamentu Investigasaun, Promosaun no Edukasaun, Monitorizasaun no Advokasia husi Diresaun Boa Governasaun, Diresaun Direitus Umanus no Diresaun Asistensia Públika. Partisipantes treinamentu mai husi funsionarius PDHJ ne’eb’e maka servisu iha Delegasaun Territorial 4 hanesan Delegasaun Baucau, Manufahi, Bobonaro no Delegasaun Oe-cusse ne’ebé realiza hahu husi loron 8-26 fulan Fevereiru 2016.
Atividade treinamentu ne’e fahe ba etapa 3 maka hanesan etapa primeiru treinamentu kona-ba Investigasaun no keixas, etapa segundu kona-ba Promosaun no Edukasaun no etapa terseiru nian kona-ba Monitorizasaun.
Entretantu Zulmira Soares Sarmento, Offisial Monitor husi Delegasaun Teritorial Baucau hateten nia sente kontente tanba bele hetan oportunidade hodi bele hasa’e koñesimentu kona-ba teknika halo monitorizasaun iha sella detensaun no mos ba situasaun geral bazeia mandatu PDHJJ.
Iha oportunidade hanesan Xisto da Costa Pinhero hateten liu husi kapasitasaun nu’udar referensia no bukae ida hodi bele haforsa liu tan nia badaen no abilidade ne’ebé durante nia iha ona. Xisto rekoñese katak ho treinamentu referee nia bele aprende liu tan materia espesifiku kona-ba monitorizasaun.Xisto sujere iha futuru treinamentu identiku presiza aumenta tempu atu nune’e bele elabora di’ak liu tan materia espesifiku liu tan. Programa ne’e hetan tulun finanseiru husi Estados Unidos da Amerika no Governo New Zealand.