Díli, 9 marsu 2026 – Provedór Direitus Umanus no Justisa, Virgílio da Silva Guterres “Lamukan”, hasoru malu ho Xefe Unidade Asesoria Direitus Umanus ONU nian iha Timor-Leste, Raja Azwa Petra, iha eskritóriu temporáriu PDHJ nian iha Excelsior Resort, Dili, hodi diskute área xave sira kona-ba kolaborasaun no promosaun ba protesaun direitus umanus. Enkontru ne’e ko’alia kona-ba asuntu krítiku sira inklui formasaun direitus umanus ba F-FDTL no PNTL, ho diskusaun ne’ebé foka liu ba hala’o avaliasaun potensiál kona-ba impaktu formasaun nian hodi permite halo reajustamentu ba aprosimasaun sira ka atualizasaun ba manuál formasaun sira, hodi garante katak esforsu sira ba kapasitasaun tradús ba rezultadu sira ne’ebé signifikativu iha terrenu. Enkontru ne’e mós kobre posibilidade atu hasoru malu ho Relatór Espesiál ONU nian kona-ba Abitasaun Adekuadu no mós mekanizmu no órgaun sira seluk direitus umanus ONU nian, durante Enkontru Anuál GANHRI nian iha Jenebra, ne’ebé marka ona ba loron 30 fulan-marsu to’o loron 1 fulan-abril tinan 2026.
Xefe Unidade Asesoria Direitus Umanus ONU nian apresia ba inisiativa Provedór nian hodi hato’o karta ida ba Parlamentu Nasionál hodi husu ratifikasaun ba Protokolu Fakultativu ba Konvensaun Kontra Tortura (OPCAT), no hato’o apoiu ba kolaborasaun iha futuru hodi dezenvolve prosesu Revizaun Periódika Universál (UPR) Timor-Leste nian. Provedór Virgílio da Silva Guterres “Lamukan” apresia enkontru produtivu ne’e no reafirma ninia kompromisu atu mantein kooperasaun besik liuhosi konsulta regulár sira hodi haree ba kestaun sira ne’ebé mosu relasiona ho protesaun no promosaun direitus umanus iha Timor-Leste.
This post is also available in: English