Dí1i, 17 fevereiru 2026— Ohin, ita hamutuk ho ita nia maun no alin sira husi desendénsia Xíneza hodi selebra festividade importante liu iha kalendáriu Xinés ni’an maka: Tinan foun xinés, koñesidu mós hanesan “Festival Primavera nian”.
Komunidade Xineza halo parte iha istória Timor-Leste nian iha tempu naruk. Sira-nia prezensa no sira-nia dedikasaun kontribui ona ba ita-nia dezenvolvimentu ekonómiku no sosiál. Ba ida-ne’e, sira merese ita-nia agradesimentu no rekoñesimentu.
Nu’udar Provedór ba Direitus Umanus no Justisa, ha’u hakarak fo hanoin hikas katak ita-nia Konstituisaun, iha Artigu 16 (Universalidade no Igualdade) , afirma katak sidadaun hotu-hotu hanesan iha lei nia oin no katak ema ida labele hetan diskriminasaun tanba, entre sira seluk, konviksaun polítika ka ideolójika, relijiaun, eh orijen sosiál. Prinsípiu fundamentál ida-ne’e fó hanoin mai ita katak komunidade hotu-hotu iha Timor-Leste, la haree ba orijen ka tradisaun merese respeitu, dignidade no liberdade hanesan atu selebra ninia identidade.
Desizaun Governu nian hodi fó loron toleránsia ida ohin, reflete espíritu konstitusionál ida-ne’e. Rekoñese katak Timor-Leste nu’udar nasaun ida ne’ebé harii iha diversidade, respeitu ba malu no armonia entre ninia komunidade sira hotu.
Iha mundu ohin loron ne’ebé diferensa sira dala barak liu hafahe ema, Timor-Leste hamriik nu’udar ezemplu. Nasaun ida iha ne’ebé maioria Katólika maibé la’o iha armonia no dame ho komunidade minoria seluk.
Mai ita aproveita loron ida ne’e hodi vizita malu, hodi fahe ksolok ho ita-nia maun-alin xinés sira no reafirma katak ita-nia unidade mak ita-nia forsa boot liu.
Ba maluk komunidade Xineza: Ksolok Tinan Foun! Dezeju tinan foun ida ne’e lori prosperidade, saúde no ksolok.
No ba timoroan tomak: atu ita sai nafatin nasaun ida ne’ebé valoriza kultura hotu-hotu, respeita tradisaun hotu-hotu no sidadaun ida-idak sente katak nia hela iha nia uma.
GONG XI FA CAI!
Obrigadu. Virgílio da Silva Guterres “Lamukan”
Provedór Direitus Umanus no Justisa
This post is also available in: English