Dili, 9 setembru 2025 – Provedoria Direitus Umanus no Justisa (PDHJ) partisipa iha lansamentu ofisiál Grupu Media Juventude Repórter ba Demokrasia, ne’ebé organiza husi Alumni Parlamentu Foinsa’e Timor-Leste (APFTL) iha Salaun CNC. Eventu ne’e halibur joven na’in 25 hosi grupu oioin, inklui joven ho defisiénsia, membru sira hosi komunidade LGBTQ+, no joven sira seluk.
Reprezenta PDHJ, Provedór-Adjuntu ba Boa Governasaun Rigoberto Monteiro partisipa iha lansamentu ne’e no mos sai hanesan oradór ho topiku “Oinsa PDHJ Avalia Situasaun Atuál Direitu Labarik iha Timor-Leste.” Iha nia intervensaun, nia elojia APFTL nia inisiativa hodi kria Grupu Reporter Mídia Foin-sa’e no subliña importánsia atu inklui foin-sa’e marjinalizadu sira hanesan ema ho defisiénsia, feto foin-sa’e no foin-sa’e LGBTIQ+ iha diskusaun públiku. Nia mós rekoñese apoiu husi Plan Internasionál Timor-Leste, UNICEF, no Uniaun Europeia, ne’ebé finansia atividade ne’e hanesan parte ida husi parseria estratéjiku ho APFTL.
Husi PDHJ nia perspetiva, kriasaun grupu Reporter Juventude nu’udar pasu signifikativu ida atu fó lian ba foin-sa’e sira ne’ebé vulneravel no atu hametin advokasia, partikularmente liuhosi mídia sosiál kona-ba asuntu sira ne’ebé relasiona ho direitu labarik no foin-sa’e sira-nian. Nu’udar órgaun konstitusionál independente ida ne’ebé hetan mandatu atu proteje no promove direitus umanus tuir lejislasaun nasionál no tratadu internasionál sira hanesan Konvensaun Direitu Labarik (CRC), PDHJ sei kontinua halo monitorizasaun, advokasia, no servisu hamutuk ho parseiru sira atu nune’e direitu fundamentál labarik no foin-sa’e sira nian hetan protesaun efetivu.
This post is also available in: English