Bali, Indonézia 27-28 agostu 2025- Provedór ba Direitus Umanus no Justisa (PDHJ) no Komisi Nasional Hak Asasi Manusia Republik Indonesia (KOMNAS HAM) hasoru malu iha Bali hodi halo mapamentu ba asaun konjunta sira ba protesaun direitus umanus iha fronteira Timor-Leste-Indonézia no atu avansa implementasaun ba Memorandu Intendimentu ne’ebé asina ona iha Jakarta iha loron 20 fulan-novembru tinan 2023. Akordu ne’e estabelese atu hatan ba preokupasaun sira kona-ba direitus umanus iha komunidade sira iha fronteira no hametin instituisaun nasionál direitus umanus rai rua nian.
Diskusaun sira foka ba prioridade rua:
- Promove no proteje direitus umanus iha komunidade sira iha fronteira liuhosi programa formasaun no diálogu ho lider lokál sira, Polísia Nasionál Timor-Leste (PNTL), Polísia Nasionál Indonézia (POLRI), FALINTIL-Forsa Defeza Timor-Leste (F-FDTL), no Forsa Armada Indonézia (TNI). Ida-ne’e inklui estudu hamutuk no advokasia kona-ba direitu sivíl, sosiál, ekonómiku, no kulturál.
- Harii kapasidade institusionál liuhosi dezenvolve materiál formasaun direitus umanus, hala’o programa kapasitasaun ba formadór no funsionáriu sira husi instituisaun rua ne’e, hala’o estudu komparativu, no fó asisténsia téknika hodi hadi’a mekanizmu atendimentu públiku.
Enkontru ne’e rezulta iha nota konseitu no esbosu akordu kooperasaun rua, ne’ebé sei asina formalmente iha tempu badak.
Diskusaun akordu servisu ne’e hala’o iha Otél Four Points iha Bali no halibur reprezentante seniór sira husi parte rua. Delegasaun KOMNAS HAM inklui Wakil Ketua Internal Komnas HAM Prabianto Mukti Wibowo, Komisioner Pendidikan dan Penyuluhan Abdul Haris Semendawai, Komisioner Penelitian dan Pengkajian Atnike Nova Sigiro, Sekretaris Jenderal Henry Silka Innah, Kepala Biro Hukum, Humas dan Kerja Sama Gatot Ristanto, Kepala Biro Dukungan Penegakan HAM Imelda Saragih, Kepala Biro Dukungan Pemajuan HAM, Endang Sri Melani no Kepala Biro Perencanaan dan Pengawasan Internal Noviati Listiyasningsih, nomós funsionariu no tékniku profesional sira.
Delegasaun PDHJ nian lidera husi Provedór Virgílio da Silva Guterres “Lamukan,” akompaña husi Provedór-Adjuntu ba Boa Governasaun Rigoberto Monteiro, Xefe Gabinete Áureo José António Savio, Diretóra Promosaun Joanita Silvira da Costa, no pesoál Espesialista Planeamentu no Programa, Martinho Moniz.
Akordu sira ne’e sei hametin kolaborasaun transfronteirisu no reforsa instituisaun rua nia kompromisu atu proteje no promove direitus umanus iha rejiaun.
This post is also available in: English