Aileu, 28-30 maiu 2025 – Workshop loron tolu hala’o ho susesu iha munisípiu Aileu ho tema: “Prevene no Kombate Korrupsaun, Promove Governasaun Di’ak, no Proteje Direitus Umanus iha Servisu Administrasaun Públika.”
Formasaun ne’e implementa husi ekipa quadrilaterál ne’ebé kompostu husi Provedoria Direitus Humanus no Justisa (PDHJ), Komisaun Anti Korrupsaun (CAC), Inspesaun Jerál Estadu (IGE), no Komisaun Funsaun Públika (CFP). Esforsu hamutuk ne’e hetan apoiu iha Projetu Parseria Tri-Partida ne’ebé involve PDHJ, Programa Nasoens Unidas ba Dezenvolvimentu (PNUD), no Gabinete Altu Komisáriu ba Direitus Umanus (OHCHR) – GANHRI.
Iha sesaun abertura, Sekretáriu Ezekutivu Ambrosio Graciano Soares realsa katak formasaun ne’e ho objetivu atu hametin kooperasaun institusionál no hasa’e koñesimentu entre funsionáriu públiku sira iha liña ministériu sira kona-ba oinsá promove integridade, prevene korrupsaun, proteje direitus umanus, no hasa’e efisiénsia no efikásia iha administrasaun públika.
João Bosco dos Santos, Prezidente Autoridade Munisípiu Aileu (PAM), hato’o agradesimentu ba PDHJ no parseiru sira tanba inisia ona formasaun ne’e. Nia enkoraja partisipantes hotu inklui administradór postu, diretór munisípiu, xefe departementu, no funsionáriu públiku sira atu involve tomak iha formasaun refere hodi hasae kualidade prestasaun atendimentu públiku ba komunidade.
Workshop ne’e halibur partisipante na’in 63, inklui mane na’in 49 no feto na’in 14, hotu-hotu kaer kargu lideransa no administrasaun xave iha munisípiu.
Inisiativa ida-ne’e marka marku importante ida iha Timor-Leste nia kompromisu atu haburas instituisaun públika sira ne’ebé transparente, responsável, no respeita direitu sira liuhosi kolaborasaun forte entre ajénsia sira.
This post is also available in: English