Ermera, 11 juñu 2025 – Provedór Direitus Umanus no Justisa, Virgílio da Silva Guterres “Lamukan”, akompaña husi Diretór Delegasaun Territoriál PDHJ Maliana, Domingos Tavares, vizita Prizaun Gleno hodi halo avaliasaun direta ba kondisaun sira ne’ebé rekluzu sira hasoru.
Vizita ne’e halo parte husi mandatu Provedoria nian nu’udar órgaun fiskalizasaun independente ne’ebé responsavel ba monitorizasaun prizaun sira iha Timor-Leste hodi prevene violasaun direitus umanus, inklui tortura no tratamentu aat ba rekluzu sira.
Durante inspesaun, Provedór rona keixa no rekomendasaun oioin husi rekluzu mane no feto sira. Entre kestaun sira ne’ebé levanta maka falta asesu ba televizaun, ne’ebé maka limita sira nia abilidade atu mantein informadu kona-ba dezenvolvimentu nasionál, no preokupasaun sira kona-ba irregularidade iha fornesimentu ai-han nian, ho relatóriu sira katak refeisaun la serve tuir menu ne’ebé maka planeadu tanba atrazu hosi fornesedór ai-han sira.
Rekluzu sira mós espresa preokupasaun kona-ba prosesu no justisa hosi indultu Prezidente Repúblika ni’an, hodi husu transparénsia no ekuidade iha aplikasaun, partikularmente ba prizioneiru sira ne’ebé kumpri pena naruk liu ka sira ne’ebé idozu ona.
Nu’udar resposta, Provedór garante ba dadur sira katak sira-nia preokupasaun hotu-hotu nota ona no sei komunika ba Ministru Justisa atu konsidera liután. Nia mós husu ba ofisiál prizionál sira atu mantein komunikasaun konstrutivu ho rekluzu sira hodi ajuda rezolve keixa sira no promove ambiente pozitivu iha prizaun laran.
Prizaun Gleno agora daudaun iha rekluzu na’in 102.
This post is also available in: English