Dili, 11 juñu 2025 – Provedór Direitus Umanus no Justisa, Virgílio da Silva Guterres “Lamukan”, akompaña husi Sekretáriu Ezekutivu, Ambrosio Graciano Soares, no Diretór Delegasaun Territoriál Maliana, Domingos Pinto Tavares, hala’o enkontru ho Prezidente Autoridade Munisípiu Ermera José Martinho dos Santos Soares, ho nia ekipa. Objetivu husi enkontru ne’e atu husu Autoridade nia apoiu hodi fó espasu hodi akomoda pontu fokál PDHJ na’in rua ne’ebé sei koloka iha Munisípiu Ermera.
Inisiativa ida ne’e ho objetivu atu hakbesik servisu PDHJ nian ba povu Ermera. Komunidade sira sei la presiza ona halo viajen ba Dili ka Maliana atu hato’o keixa relasiona ho violasaun direitus umanus ka kestaun governasaun di’ak, tanba asuntu hirak ne’e agora bele rezolve lokalmente iha Gleno. Provedór subliña katak movimentu ida-ne’e sei hamenus ho signifikativu distánsia no todan ba sidadaun sira ne’ebé buka asisténsia.
Provedór mós rekomenda ba Prezidente Autoridade atu garante planu desentralizasaun iha futuru ba merkadu lokál sira koloka besik komunidade sira, hanesan halo tiha ona ho Merkadu Comoro no Merkadu Lama, hodi fasilita asesu ba kompradór sira, liuliu sira ne’ebé laiha transporte. Alleinde ida ne’e, Provedór enkoraja atu hametin funsaun Relasaun Públika iha Administrasaun Munisipál nia laran atu nune’e Autoridade bele fahe informasaun ho efetivu liután no responde bainhira notísia sira mídia nian laloos.
Hatan ba ne’e, Prezidente Autoridade Munisipiu Ermera simu pedidu ne’e ho laran ksolok no konfirma nia kompromisu atu apoiu kolokasaun pontu fokál PDHJ nian. Nia oferese fatin (cobby house) ida iha Eskritóriu Administrasaun nia kotuk hanesan fatin serbisu nian ba sira. Prezidente mós hatudu satisfasaun ho inisiativa ida-ne’e, hodi nota katak ida-ne’e sei ajuda hadi’a prestasaun servisu públiku no responsabilizasaun. Kona-ba Merkadu Gleno, nia garante katak esforsu desentralizasaun sei tau prioridade ba prosimidade ho komunidade sira. Nia mós agradese ba Provedór ba sujestaun atu hametin liután Relasaun Públika iha Administrasaun nia laran.
Enkontru ne’e hala’o iha Salaun Enkontru Autoridade Munisipál Ermera nian iha Gleno iha loron 11 fulan-Juñu tinan 2025.
This post is also available in: English