Dili, 16-17 Juñu 2025 —Provedoria Direitus Umanus no Justisa (PDHJ), liuhosi nia Unidade Asisténsia Jurídika, Administrativa no Peskiza (UAJAP), hala’o ho susesu workshop validasaun durante loron rua hodi aprezenta no hametin esbosu relatóriu avaliasaun impaktu kona-ba implementasaun tinan lima (2021–2015) Planu Asaun Nasionál ba Ema ho Defisiénsia sira (PAN-EhD 2021–2030).
Workshop ne’e loke husi Provedór Direitus Umanus no Justisa, Virgílio da Silva Guterres “Lamukan”, no taka formalmente husi Provedóra-Adjunta Direitus Umanus, Maria Marília da Costa, hodi marka lideransa forte no kompromisu instituisaun nian iha prosesu tomak.
Loron dahuluk workshop nian halibur reprezentante sira hosi ministériu implementadór sanulu-resin-ida ne’ebé responsavel ba ezekusaun planu nian. Iha ninia abertura, Provedór hato’o apresiasaun kle’an ba ministériu sira-nia esforsu no apoiu krusiál husi Programa Nasoins Unidas ba Dezenvolvimentu (PNUD) liuhosi Projetu Parseria Tripartida. Nia fó hanoin ba partisipante sira katak “monitorizasaun no avaliasaun la’ós kona-ba kondena ka fó sala. Maibé ne’e hanesan ferramenta ne’ebé ajuda ita atu reflete, aprende, no ajusta ita-nia dalan atu nune’e ita-nia Planu Asaun Nasionál la’os liafuan iha surat-tahan de’it, maibé lori mudansa ne’ebé signifikativu iha ema ho defisiénsia nia moris.”
Loron daruak envolve grupu sosiedade sivíl, organizasaun sira hosi ema ho defisiénsia, no ema ho defisiénsia. Provedór subliña katak workshop ne’e nu’udar momentu ida atu hafoun nasaun nia promesa katak “Timor-Leste sei la husik ema ida iha kotuk,” hodi subliña katak “polítika no lei sira só bele moris liuhusi korajen no determinasaun husi sira ne’ebé servisu loron-loron atu harahun barreira sira no kria sosiedade ida ne’ebé justu no inkluzivu liu.” Prinsípiu “Laiha buat ida kona-ba ami, sé lahó ami” maka sai hanesan sentru atu asegura katak planu asaun responde ba nesesidade reál sira hosi ema ho defisiénsia.
Iha nia diskursu enseramentu, Provedór-Adjunta Direitus Umanus, hato’o agradesimentu ba partisipante sira hotu, fasilitadór sira, konsultóra, no ekipa organizadóra. Nia subliña katak workshop ne’e hatudu ona importánsia atu promove direitu, inkluzaun, no dignidade ba ema hotu, liuliu ba ema sira ho defisiénsia. Nia destaka katak rezultadu sira husi avaliasaun ida-ne’e sei orienta PDHJ nia advokasia atu hadi’a servisu sira no informa polítika públika atu nune’e asaun governu nian bele responde loloos ba nesesidade reál husi ema ho defisiénsia sira iha Timor-Leste. Nia nota, “Ha’u hein katak esperiénsia hosi workshop ida-ne’e fó inspirasaun no motivasaun ba ita hotu atu kontinua halo mudansa pozitivu.”
Eventu ne’e konklui ho fahe sertifikadu apresiasaun ba partisipante sira nu’udar rekoñesimentu ba sira-nia kontribuisaun valiozu ba prosesu validasaun.
Atividade ida-ne’e halo parte iha PDHJ nia Planu Asaun Anuál 2024 no hetan apoiu hosi PNUD iha ámbitu Projetu Parseria Tripartida, ho objetivu atu hametin monitorizasaun no avaliasaun ba tinan lima dahuluk implementasaun PAN-EhD nian. Liuhusi inisiativa ida-ne’e, PDHJ reafirma ninia kompromisu atu harii Timor-Leste ida-ne’ebé inkluzaun la’ós aspirasaun de’it, maibé realidade moris ba ema hotu.
This post is also available in: English