Dili, 28 maiu 2025 — Provedoria dos Direitos Humanos e Justiça (PDHJ) simu vizita kortezia nivel aas ida hosi delegasaun governu Malázia nian, lidera hosi M. Kula Segaran, Vise-Ministru iha Departamentu Primeiru-Ministru nian (Lei no Reforma Institusionál), nu’udar parte ida hosi inisiativa Malázia nian hodi aprende hosi modelu internasionál sira iha preparasaun ba estabelesimentu instituisaun Provedoria iha Malázia.
Delegasaun ne’e hetan akompañamentu husi Dato’ Amarjit Sarjit Singh, Embaixadór Malázia iha Timor-Leste, ne’ebé partisipa mós iha enkontru ne’e.
Reprezenta PDHJ maka Virgílio da Silva Guterres Lamukan, Provedór ba Direitus Umanus no Justisa; Rigoberto Monteiro, Provedór-Adjuntu ba Boa Governasaun; Maria Marília da Costa, Provedóra-Adjunta- ba Direitus Umanus; no ofisiál superiór sira seluk.
Vizita ne’e fó oportunidade ba delegasaun Malázia atu aprende kona-ba PDHJ nia estrutura institusionál, mandatu, no esperiénsia durante ninia viajen durante tinan 21 nia laran. Nu’udar instituisaun íbrida ne’ebé kombina protesaun direitus umanus ho promosaun governasaun di’ak, PDHJ fahe hanoin kona-ba nia mekanizmu tratamentu ba keixa, prosesu fiskalizasaun, no enkuadramentu legál.
Provedór, Virgílio Guterres, hato’o nia apresiasaun sinseru ba delegasaun ne’ebé inklui PDHJ iha sira-nia programa ofisiál no ba sira-nia interese atu aprende husi Timor-Leste nia esperiénsia. Nia nota katak interkámbiu sira hanesan ne’e hametin kooperasaun rejionál no reforsa kompromisu sira ne’ebé fahe ba transparénsia no justisa.
Iha diskusaun ne’e mós esplora área sira ho interese mútuo, inklui protesaun ba denunsiante sira, prevensaun administrasaun ne’ebé ladi’ak, no sistema jestaun keixa nian. Delegasaun Malázia hato’o konvite ba PDHJ atu partisipa iha Konferénsia Provedoria ne’ebé sei realiza iha Malázia, ne’ebé instituisaun ne’e simu ho pozitivu.
Enkontru ne’e reflete kolaborasaun rejionál ne’ebé buras no subliña knaar PDHJ nian nu’udar pontu referénsia ba instituisaun sira ne’ebé serbisu atu tane aas integridade, responsabilizasaun, no direitus umanus.
This post is also available in: English