Dili, 25 Marsu 2025 – Provedór ba Direitus Umanus no Justisa, Virgílio da Silva Guterres ‘Lamukan’, partisipa nu’udar panelista iha mini-workshop ida kona-ba “Promove Direitus Umanus iha Timor-Leste: Garante Aliñamentu Lejislativu no Rekoñese Direitu sira hosi Indivídu LGBTI+ ho Defisiénsia sira.” Ninia prezensa subliña kompromisu hosi Provedoria ba Direitus Umanus no Justisa (PDHJ) hodi avansa protesaun legál ba grupu marjinalizadu sira, inklui ema sira ho defisiénsia no komunidade LGBTIQ+.
Workshop ne’e ho objetivu atu esplora mekanizmu lejizlativu sira ne’ebé apoia direitu indivídu LGBTIQ+ nian iha aliñamentu ho espíritu Konstituisaun Repúblika Demokrátika Timor-Leste (RDTL) no konvensaun direitus umanus internasionál sira.
Durante diskursu, Provedór Guterres subliña katak PDHJ harii atu promove no proteje direitus umanus, ho nia mandatu ne’ebé abranje indivídu hotu-hotu, inklui komunidade minoria no marjinalizadu sira.
“Ita rekoñese katak komunidade LGBTIQ+ dalabarak hetan marjinalizadu no hasoru negasaun ba sira nia direitu ho forma oioin. Maski nune’e, sira nia ezisténsia hanesan realidade ida ne’ebé labele ignora”, nia afirma iha eventu, ne’ebé akontese iha sede Cruz Vermelha Timor-Leste (CVTL) iha Díli.
Nia enkoraja liután kolaborasaun entre organizasaun sosiedade sivíl sira, inklui Arcoiris Timor-Leste, Plan Internasionál, no grupu advokasia ba defisiénsia sira, hodi subliña katak prinsípiu “la husik ema ida iha kotuk” labele sai de’it hanesan slogan kampaña nian maibé tenke tradús ba asaun konkreta sira. “Tantu ema sira ho defisiénsia no indivídu sira ho orientasaun seksuál oioin tenki hetan rekoñesimentu no tratamentu hanesan iha prátika, la’ós de’it iha teoria”, nia insiste.
Workshop ne’e organiza husi Plan International Timor-Leste (PITL), Arcoiris Timor-Leste (ATL), no Asosiasaun Halibur Defisiensia Matan Timor-Leste (AHMDTL). Ida-ne’e halibur ema ho defisiénsia sira, membru sira hosi komunidade LGBTIQ+, estudante universitáriu sira hosi UNTL, no líder lokál sira, inklui xefe Suku sira, hodi diskute estratéjia sira hodi haburas inkluzividade no direitu hanesan iha Timor-Leste.
This post is also available in: English