New Delhi, Índia, 9 marsu 2025 – Provedoria Direitus Umanus no Justisa Timor-Leste (PDHJ) delega funsionáriu superiór na’in haat hodi partisipa iha Programa Empoderamentu Kapasidade Ezekutivu kona-ba Direitus Umanus, ne’ebé organiza husi Komisaun Nasionál Direitus Umanus Índia (NHRC) iha kolaborasaun ho Ministériu Negósiu Estranjeiru (MEA). Programa loron neen ne’e, hala’o hosi loron 3 to’o loron 8 fulan-marsu tinan 2025, iha New Delhi, Índia, dezeña atu hasa’e mekanizmu sira protesaun direitus umanus nian entre instituisaun nasionál sira direitus umanus nian (NHRIs) hosi Súl Globál.
PDHJ simu konvite husi NHRC India nu’udar parte ida husi ninia kompromisu ne’ebé kontinua atu hametin ninia kapasidade institusionál no haburas kooperasaun internasionál. Delegasaun ne’e inklui:
- Ambrosio Graciano Soares, Sekretáriu Ezekutivu
- Filomena Maria de Fátima Diaz, Xefe Unidade Asisténsia Jurídika, Administrativa, no Peskiza
- Elsa do Rosario Viegas da Costa, Diretora ba Asisténsia Públika
- Bartolomeu Gonçalves, Diretór Inspesaun no Rekomendasaun
Programa formasaun ne’e adapta ba nesesidade espesífiku sira husi NHRI sira husi nasaun partisipante 14, inklui Madagaskar, Uganda, Samoa, Timor-Leste, RD Kongo, Togo, Mali, Nijéria, Ejiptu, Tanzánia, Maurísia, Burundi, Turkmenistaun, no Qatar. Inisiativa ne’e hakarak hametin kooperasaun Súl-Súl, haburas kolaborasaun no rede, no hasa’e koñesimentu kona-ba kuadru direitus umanus internasionál sira.
Partisipante sira envolve iha sesaun interativu sira, palestra peritu sira, no vizita sira iha kampu, ne’ebé foka ba prátika di’ak sira iha protesaun direitus umanus no efikásia institusionál. Programa ne’e mós fornese plataforma ida atu fahe esperiénsia no estratéjia sira atu hadi’a mekanizmu nasionál direitus umanus nian, hodi garante advokasia no responsabilizasaun ne’ebé forte liu iha ida-idak nia rain.
Hodi partisipa iha inisiativa ida-ne’e, PDHJ reafirma nia kompromisu atu tane aas no avansa direitus umanus iha Timor-Leste, enkuantu hametin nia forsa traballu ho prátika di’ak liu globál no hasa’e kooperasaun ho instituisaun direitus umanus internasionál sira.
This post is also available in: English