Dili, 17 fevereiru 2025 – Provedór ba Direitus Umanus no Justisa, Virgílio da Silva Guterres ‘Lamukan,’ nu’udar oradór proeminente ida iha diskusaun kona-ba protesaun labarik online, ho tema“Forma Futuru ne’ebé Seguru Liu: Polítika no Programa Governu nian ba Protesaun Labarik Online iha Timor-Leste.” Eventu ne’e marka lansamentu ba Swipe Safe-App, aplikasaun seguransa online foun ida ne’ebé dezeña atu ajuda labarik, foin-sa’e, inan-aman sira, kuidadu-na’in, no profesór sira atu la’o iha mundu dijitál ho seguru no responsabilidade. Inisiativa ne’e lidera husi Institutu Defeza Direitu Labarik (INDDICA), ChildFund Timor-Leste, no Alumni Parlamentu Foinsa’e Timor-Leste (APFTL).
Iha ninia diskursu, Guterres subliña katak protesaun ba foin-sa’e no labarik sira nu’udar responsabilidade kompartillada hosi estadu, sosiedade, no família sira, hanesan konsagra ona iha Konstituisaun Repúblika. Nia destaka katak iha era dijitál ohin loron nian, seguransa online sai hanesan direitu fundamentál ida, hodi halo direitu dijitál sira sai parte esensiál ida hosi konversa luan liu kona-ba direitus umanus.
“Direitu dijitál sira inklui mós seguransa dijitál—asegura protesaun ba dadus pesoál no komunikasaun seguru iha mundu ida ne’ebé dijitalizadu ba beibeik,” Guterres hatete. “Mundu evolui lalais, no dezafiu sira ne’ebé ita hasoru ohin loron diferente tebes hosi sira iha dékada 1970.”
Provedór reafirma nia kompromisu atu sensibiliza no promove seguransa dijitál liuhosi diskusaun no semináriu sira. Nia subliña importánsia atu atribui ba foin-sa’e no labarik sira koñesimentu no ferramenta sira atu proteje sira-nia an online enkuantu halo advokasia ba protesaun sira-nia direitu iha espasu dijitál nu’udar direitu umanu fundamentál.
“Tanba ne’e maka Provedór kontinua envolve iha diskusaun sira hanesan ne’e—hodi salvaguarda sidadaun sira nia direitu iha era dijitál,” Guterres observa durante nia aprezentasaun iha Salaun Konferénsia City8, Manleuana, Dili, iha loron 17 fulan-Fevereiru tinan 2025.
Iha sesaun ne’e konta ho oradór proeminente sira husi Provedoria Direitus Umanus no Justisa (PDHJ), INDDICA, TIC Timor IP, no Ministériu Edukasaun, ho prezensa reprezentante xave sira husi Embaixada Austrália, parte interesada xave sira, no estudante sira eskola sekundária.
This post is also available in: English