Dili, 15 agostu 2024 — Provedór Direitus Umanus no Justisa, Virgílio da Silva Guterres ‘Lamukan, organiza Meet The Press hodi atualiza ba mídia no públiku kona-ba progresu servisu Provedoria dos Direitos Humanos e Justiça (PDHJ). Eventu ne’e foka ba PDHJ nia esforsu ne’ebé la’o hela hodi proteje direitus umanus no promove governasaun di’ak, destaka papél krusiál hosi mídia iha esforsu hirak ne’e.
Guterres hato’o agradesimentu ba mídia sira nia papél hodi halo kobertura ba atividade PDHJ nian. “Ami aproveita oportunidade ida ne’e hodi hala’o Meet The Press no agradese ba mídia sira nia kobertura. Jornalista sira nia papel importante tebes, la’ós de’it tanba relata kona-ba serbisu PDHJ nian maibé mós ba sira-nia reportajen loron-loron nian ne’ebé ajuda destaka no rezolve kestaun direitus umanus,” afirma Guterres.
Nia subliña katak jornalista sira hetan rekoñesimentu nu’udar defensór direitus umanus tuir rezolusaun ONU nian, hodi subliña papél signifikativu ne’ebé mídia hala’o hodi defende direitus umanus. “Mídia nia papél estende liu tiha kobertura ba PDHJ nia programa sira. Liu husi kobertura loroloron, jornalista sira reforsa perspetiva direitus umanus, garante katak defeza direitu sidadaun sira nian hetan nafatin apoiu,” Guterres akresenta.
Provedór mós iha biban ne’e atualiza PDHJ nia atividade husi Janeiru to’o Jullu 2024, inklui jere keixa sira, monitoriza kondisaun detensaun, no promove formasaun direitus umanus. Nia salienta katak parseria mídia nian esensiál atu mantein transparénsia no responsabilizasaun iha prosesu sira-ne’e.
“Ami nia serbisu sei la sai efetivu bainhira la iha kolaborasaun hosi mídia. Proteje direitus umanus no promove governasaun di’ak hanesan responsabilidade kolaborativu, no mídia hanesan parseiru krusiál iha esforsu ne’e,” konklui Guterres.
Eventu ne’e reforsa sinerjia entre PDHJ no mídia hodi haburas sosiedade ida ne’ebé justu no informadu liu, hodi hatudu katak setór rua ne’e unidu iha sira-nia kompromisu atu defende direitus umanus no garante governasaun di’ak.
This post is also available in: English