KOMUNIKADU IMPRENSA
Enkontru Espesiál 1/2024 Komisaun Intergovernamentál ASEAN nian kona-ba Direitus Umanus
Vientiane, Lao PDR, 23-26 jullu 2024, – Komisaun Intergovernamentál ASEAN ba Direitus Umanus (AICHR) konvoka Enkontru Espesiál 1/2024 AICHR nian husi loron 23 to’o 26 jullu 2024 iha Vientiane, Lao PDR. Enkontru ne’e prezide husi Embaixadór Yong Chanthalangsy, Reprezentante Lao PDR, no Prezidente AICHR 2024, no hetan partisipasaun husi Reprezentante/Reprezentante Suplente husi AICHR, no Sekretariadu ASEAN. Timor-Leste reprezenta husi Provedoria Direitus Umanos no Justisa nia Adjuntu ba Boa Governasaun, Rigoberto Monteiro, reprezentante husi Ministériu Negósiu Estranjeiru Alfaro Julio de Araújo, reprezentante husi Ministériu Justisa Virgílio Faustino da Silva marka prezensa iha enkontru hanesan Observadór.
Enkontru ne’e hetan atualizasaun kona-ba dezenvolvimentu resente sira kona-ba direitus umanus iha rejiaun, inklui lei no regulamentu foun iha nível nasionál relasiona ho direitus umanus, no inisiativa direitus umanus husi Estadu-membru ASEAN hanesan aprezenta husi Reprezentante AICHR Indonézia, Lao PDR, Malázia, Myanmar, Filipina, Tailándia, no Singapura, respetivamente.
Enkontru ne’e diskute kona-ba progresu implementasaun husi Programa/Atividade Prioridade sira AICHR nian, inklui negósiu no direitus umanus, direitu ba ambiente ida ne’ebé seguru, moos, saudavel, no sustentável, tráfiku umanu, debate juventude kona-ba direitus umanus, prevensaun ba tortura, no implementasaun ba Rekomendasaun sira ba Revizaun Periódika Universál (UPR). Enkontru ne’e delibera inisiativa sira atu hasa’e envolvimentu AICHR nian ho Órgaun no entidade Setoriál ASEAN nian, parte interesada relevante sira, no parseiru diálogu sira, inklui preparasaun ba Diálogu Direitus Umanus ASEAN nian ba dala 6 no vizita ofisiál AICHR nian ba Xina.
Enkontru hahú diskusaun sira kona-ba Planu Servisu tinan lima tuirmai hosi AICHR ba períodu 2026-2030.
AICHR Interfase ho Ministru Negósiu Estranjeiru ASEAN no Sekretáriu-Jerál ASEAN
Iha loron 24 fulan-jullu, Reprezentante sira AICHR nian realiza Interfase anuál ho Ministru Negósiu Estranjeiru sira ASEAN nian durante Enkontru Ministru Negósiu Estranjeiru ASEAN nian ba dala 57 (AMM) no Enkontru Relevante sira. Iha interasaun ne’e mosu diskusaun nakloke entre Ministru/Vise-Ministru no Reprezentante sira AICHR nian kona-ba progresu no esforsu sira ne’ebé la’o hela atu promove no proteje direitus umanus iha rejiaun. Iha okaziaun ne’e, Prezidente AICHR nian hato’o Deklarasaun no hatama AICHR nia Relatóriu Anuál 2024 ba AMM ba dala 57.
Reprezentante AICHR sira mós hala’o sira-nia Interfase anuál ho Sekretáriu-Jerál ASEAN, Dr. Kao Kim Hourn. Parte sira fahe hanoin no deliberasaun kona-ba AICHR nia serbisu sira ne’ebé la’o hela ba avansu kooperasaun no diálogu kona-ba direitus umanus nian iha ASEAN.
Iha 25 jullu, AICHR hasoru malu ho Grupu Traballu Direitu Ambientál ASEAN (AER-WG) no hato’o apresiasaun ba sira-nia serbisu. AICHR mós hasoru malu ho Fórum Nasionál Instituisaun Direitus Umanus Sudeste Aziátiku (SEANF), ne’ebé fahe esperiénsia no diskute área posivel sira ne’ebé iha interese mútuo ba kooperasaun.
This post is also available in: English