Husi loron 10-11 fulan jullu tinan 2024, Provedoria Direitus Umanus no Justisa (PDHJ) Timor-Leste sai uma nain ba Enkontru Grupu Traballu Tékniku Daruak Fórum Instituisaun Nasionál Direitus Umanus Sudeste Aziátiku (SEANF, sigla Ingléz) iha Dili. Ho tema “Direitus Umanus ba Ema Hotu, Liu-liu iha Sudeste Aziátiku: Respeitadu, Protejidu, no Goza Igualmente husi Ema Hotu”, enkontru ne’e partisipa husi membru SEANF sira tantu pesoalmente no online.
Virgílio da Silva Guterres ‘Lamukan’, Provedór Direitus Umanus no Justisa (PDHJ), iha diskursu makloke hato’o antisipasaun ba diskusaun produtivu kona-ba asuntu krítiku direitus umanus hanesan direitu ba rai, meiu subsisténsia, no kondisaun jerál direitus umanus. Nia subliña katak rezultadu sira hosi enkontru ida-ne’e sei sai importante tebes ba aprezentasaun iha konferénsia anuál SEANF nian ne’ebé marka ona ba fulan novembru 2024.
SEANF, ne’ebé inklui Komisaun Nasionál Direitus Umanus Indonézia (KOMNAS HAM), Komisaun Direitus Umanus Malázia (SUHAKAM), Komisaun Nasionál Direitus Umanus Myanmar (MNHRC), Komisaun Direitus Umanus Filipina (CHRP), Komisaun Nasionál Direitus Umanus husi Tailándia (NHRCT), no PDHJ Timor-Leste, kolabora hodi avansa direitus umanus iha rejiaun Ázia.
Diskusaun sira durante enkontru ne’e ko’alia kona-ba asuntu urjente oioin inklui direitus umanus iha negósiu, prevensaun ba tortura no forma sira seluk kona-ba tratamentu ka kastigu ne’ebé kruél, dezumanu, degradante, tráfiku umanu, no asuntu direitus umanus transfronteirisu. Iha okaziaun ne’e, membru sira atualiza kona-ba dezenvolvimentu prinsipál sira dezde enkontru tékniku dahuluk iha Abril 2024.
Enkontru ne’e hetan mós partisipasaun husi Organizasaun Naun-Governamentál (ONG) sira hanesan ONG Aziátiku Koligasaun ba Reforma Agraria no Dezenvolvimentu Rurál (ANGOC, sigla Ingléz) no Rede Ba Rai husi Timor-Leste, ne’ebé kontribui informasaun kona-ba mekanizmu monitorizasaun no esforsu advokasia relasiona ho konflitu rai. Adisionalmente, FORUM-ASIA/ANNI diskute kona-ba dezenvolvimentu direitus umanus iha Sudeste Aziátiku no kolaborasaun potensiál sira ho SEANF.
Rezultadu husi Enkontru Tékniku Daruak SEANF nian sei uza hodi orienta diskusaun sira iha enkontru anuál SEANF ne’ebé sei akotense iha Novembru 2024 iha Dili, hodi avansa esforsu sira atu promove no salvaguarda direitus umanus iha Sudeste Aziátiku.
This post is also available in: English