Dili, 25 juñu 2024 – Provedoria Direitus Umanus no Justisa (PDHJ) liu husi sesaun Plenária Ordinária iha loron 25 juñu aprezenta relatóriu anuál tinan 2023 ni’an ba Parlamentu Nasionál.
Aprezentasaun relatóriu ne’e hodi hatan ba artigu 11, 34 no 46 husi Lei númeru 7/2004 de 26 de maiu ne’ebé fó obrigasaun ba PDHJ atu aprezenta relatóriu tinan-tinan ba Parlamentu Nasionál no relatóriu finanseira ba Tribunal de Contas tuir artigu 10, 27 no 38 husi Lei númeru 9/2011 de 17 de agostu.
Provedór Virgílio Guterres Lamukan haktuir katak maski hanesan entidade estadu ne’ebé nia mandatu atu tau-matan ba lala’ok entidade públika sira atu haktuir prátika governasaun di’ak tuir lei haruka, iha obrigasaun ne’e mós atu hakru’uk ba obrigasaun legál ida ne’e. “Ho hanesan ne’e de’it maka Provedór Direitus Umanus no Justisa iha autoridade morál atu tau-matan no fiskaliza entidade públika sira,” Provedór hateten.
Iha relatóriu ne’ebé aprezenta husi Provedór Direitus Umanus no Justisa, Virgílio da Silva Guterres ‘Lamukan’, no Provedór-Adjuntu Rigoberto Monteiro ne’e konsiste husi programa boot rua maka hanesan, programa direitus umanus no governasaun di’ak no programa funsionamentu dezenvolvimentu institusionál, sub-programa hitu no atividade hamutuk 20.
Hodi implementa atividade hirak ne’e, orsamentu ba Provedoria iha tinan 2023 hamutuk US$ 1, 803,421,00 ne’ebé fahe ba kategoria tolu, Salariu no Vensimentu US$ 1,367,692.00 ekivale 76% hosi totál dotasaun, bens no servisus US$420,549.00 ekivale 23% hosi dotasaun totál, no transferénsia públiku US$ 15.000.00 ekivale 1% hosi orsamentu aprovadu.
Husi totál Orsamentu Jerál Estadu (OJE) 2023 ne’ebé aloka, PDHJ ezekuta pursentu 94.5.
Alende aprezenta relatóriu anual tinan 2023, PDHJ aprezenta mós servisu ne’ebé halo husi janeiru to’o maiu 2024 no previzaun sira ba futuru.
Iha sesaun aprezentasaun ne’e hetan apresesiasaun, krítika, no rekomendasaun husi deputadu sira. Ba ida ne’e Provedór Direitus Umanus no Justisa hato’o nia apresiasaun ba Parlamentu Nasionál no afirma sei halo tuir rekomendasaun sira ne’e no sei kontinua hametin koperasaun iha futuru hodi bele hamutuk proteje no promove direitus umanus no governasaun di’ak.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi Vise na’in rua, ho prezensa Deputadu no Deputada sira, Provedór no Adjuntu hamutuk ho Diretór no Kargu Xefia no Asesór sira.
This post is also available in: English